പ്രധാനമന്ത്രിയുമായി കൂടിക്കാഴ്ച നടത്തി വിഡി സതീശന്‍

ദില്ലി: പ്രധാനമന്ത്രി നരേന്ദ്രമോദിയുമായി മുഖ്യമന്ത്രി വി ഡി സതീശന്‍ കൂടിക്കാഴ്ച നടത്തി. ഏകദേശം 20 മിനിറ്റ് നീണ്ട കൂടിക്കാഴ്ച പ്രധാനമന്ത്രിയുടെ സേവാതീര്‍ത്ഥിലെ ഓഫീസിലായിരുന്നു. മുഖ്യമന്ത്രിയായതിന് ശേഷം പ്രധാനമന്ത്രിയുമായുള്ള വി ഡി സതീശന്റെ ആദ്യ കൂടിക്കാഴ്ചയാണിത്.

ചീഫ് സെക്രട്ടറിയുള്‍പ്പെടെയുള്ള ഉദ്യോഗസ്ഥ സംഘം മുഖ്യമന്ത്രിക്കൊപ്പം ഉണ്ടായിരുന്നു. കേരളത്തിന്റെ വികസനവുമായി ബന്ധപ്പെട്ട വിവിധ വിഷയങ്ങള്‍ ചര്‍ച്ചയായതായാണ് ലഭിക്കുന്ന വിവരം.

സംസ്ഥാനത്തിന് കേന്ദ്രസഹായം ആവശ്യമായ നിരവധി വികസന പദ്ധതികള്‍ കൂടിക്കാഴ്ചയില്‍ ഉയര്‍ന്നുവന്നതായി സൂചനയുണ്ട്. റെയില്‍വേ വികസനം, തുറമുഖ പദ്ധതികള്‍, എയിംസ്, മെട്രോ വികസനം തുടങ്ങി കേന്ദ്രസഹായത്തോടെ നടപ്പാക്കേണ്ട വിവിധ പദ്ധതികള്‍ക്ക് പിന്തുണ ഉറപ്പാക്കുകയാണ് കൂടിക്കാഴ്ചയുടെ പ്രധാന ലക്ഷ്യമെന്നാണ് വിലയിരുത്തല്‍.

ഇന്ന് ഉച്ചയ്ക്കുശേഷം ധനമന്ത്രി നിര്‍മല സീതാരാമനുമായും വി ഡി സതീശന്‍ കൂടിക്കാഴ്ച നടത്തും. നാളെ ആഭ്യന്തരമന്ത്രി അമിത് ഷായുമായി ചര്‍ച്ച നടത്തിയ ശേഷമാകും മുഖ്യമന്ത്രിയുടെ ദില്ലി സന്ദര്‍ശനം പൂര്‍ത്തിയാക്കി മടക്കം.