ചെങ്കൊടി വിട്ടൊരു രാഷ്ട്രീയം ഇല്ല; പ്രചരണങ്ങള്‍ തള്ളി കെ ടി ജലീല്‍

കൊച്ചി: തനിക്കെതിരെ സാമൂഹ്യ മാധ്യമങ്ങളില്‍ പ്രചരിക്കുന്ന വാര്‍ത്തകള്‍ അടിസ്ഥാനരഹിതമാണെന്ന് മുന്‍ മന്ത്രി കെ ടി ജലീല്‍ വ്യക്തമാക്കി. ഇടതുപക്ഷ രാഷ്ട്രീയത്തില്‍ നിന്നു മാറുന്നുവെന്ന തരത്തിലുള്ള പ്രചരണങ്ങള്‍ തള്ളിക്കളഞ്ഞ അദ്ദേഹം, ചെങ്കൊടിയോട് ചേര്‍ന്ന രാഷ്ട്രീയ നിലപാടില്‍ ഉറച്ചുനില്‍ക്കുമെന്ന് ഫേസ്ബുക്ക് കുറിപ്പിലൂടെ അറിയിച്ചു.

ലീഗ് എന്റെയും കൂടി പാര്‍ട്ടിയാണ്, തിരിച്ചുവിളിച്ചാല്‍ പോകാന്‍ തയ്യാറാണ് എന്ന തരത്തില്‍ സമൂഹമാധ്യമങ്ങളില്‍ പ്രചരിക്കുന്ന പരാമര്‍ശങ്ങള്‍ താന്‍ നടത്തിയിട്ടില്ലെന്ന് കെ ടി ജലീല്‍ വ്യക്തമാക്കി. ചുവപ്പിനെ പ്രണയിച്ചാണ് പൊതുരംഗത്ത് തുടരുന്നതെന്നും ഇടതുപക്ഷത്തോടൊപ്പം ശക്തമായി മുന്നോട്ട് പോകുമെന്നും അദ്ദേഹം പറഞ്ഞു.

ഇടതുപക്ഷ പ്രസ്ഥാനത്തോടുള്ള പ്രതിബദ്ധത ആവര്‍ത്തിച്ച ജലീല്‍, 'തല പോയാലും വിശ്വസിച്ചവരെ വഞ്ചിക്കില്ല' എന്നായിരുന്നു പ്രതികരണം. ജയപരാജയങ്ങളിലെല്ലാം ഒപ്പമുണ്ടാകുമെന്നും അവസാനം വരെ പഴശ്ശിരാജാവിനൊപ്പം നിന്ന ഉണ്ണിമൂസയുടെയും അത്തന്‍കുരിക്കളുടെയും പിന്‍മുറക്കാരനായി സഖാവ് പിണറായി വിജയന്‍ക്കും പാര്‍ട്ടിക്കും പിന്നില്‍ ഉറച്ചുനില്‍ക്കുമെന്നും അദ്ദേഹം കുറിച്ചു.