പിണറായി പ്രതിപക്ഷ നേതാവ്; തീരുമാനം അന്തിമമെന്ന് എം വി ഗോവിന്ദന്‍

ന്യൂഡല്‍ഹി: പിണറായി വിജയന്‍ പ്രതിപക്ഷ നേതാവായി തെരഞ്ഞെടുക്കപ്പെട്ട കാര്യത്തില്‍ ഇനി യാതൊരു പുനഃപരിശോധനയും ഉണ്ടാകില്ലെന്ന് സിപിഐഎം സംസ്ഥാന സെക്രട്ടറി എം വി ഗോവിന്ദന്‍ വ്യക്തമാക്കി. സംസ്ഥാന കമ്മിറ്റിയുടെയും സെക്രട്ടറിയേറ്റിന്റെയും ഏകകണ്ഠമായ തീരുമാനമാണ് ഇതെന്നും പോളിറ്റ് ബ്യൂറോയുടെ അംഗീകാരം ലഭിച്ച ശേഷമാണ് പ്രഖ്യാപനമെന്നും അദ്ദേഹം പറഞ്ഞു.

പാര്‍ട്ടി യോഗങ്ങളിലെ വിമര്‍ശനങ്ങളായി പുറത്തുവരുന്ന പല വാര്‍ത്തകളും മാധ്യമസൃഷ്ടിയാണെന്ന് എം വി ഗോവിന്ദന്‍ ആരോപിച്ചു. പാര്‍ട്ടി അംഗങ്ങള്‍ക്ക് നിര്‍ഭയമായി അഭിപ്രായം പറയാനാണ് നിര്‍ദേശം നല്‍കിയിരുന്നതെന്നും അദ്ദേഹം പറഞ്ഞു. സിപിഐഎം സെക്രട്ടറിക്കെതിരെ ഉയരുന്ന വിമര്‍ശനങ്ങളെ കുറിച്ച് പ്രതികരിക്കവെ തങ്ങളെ അല്ലാതെ പിന്നെ ആരെയാണ് വിമര്‍ശിക്കുക എന്നും അദ്ദേഹം ചോദിച്ചു.

പരിയത്ത്കാവിലെ ഭൂമി ഒഴിപ്പിക്കല്‍ നടപടികളെയും എം വി ഗോവിന്ദന്‍ വിമര്‍ശിച്ചു. സര്‍ക്കാര്‍ രേഖകളില്‍ പുറമ്പോക്ക് ഭൂമിയായാണ് സ്ഥലം രേഖപ്പെടുത്തിയിരിക്കുന്നതെന്നും വര്‍ഷങ്ങള്‍ക്ക് മുമ്പ് സ്വാധീനമുള്ള ചിലര്‍ സര്‍ക്കാര്‍ ഓഫീസുകളെ സ്വാധീനിച്ച് ഭൂമിക്ക് ആധാരം ഉണ്ടാക്കിയെടുത്തുവെന്നും അദ്ദേഹം ആരോപിച്ചു.