അബ്ദുള്‍ റഹീമിന്റെ ശിക്ഷാ കാലാവധി ചൊവാഴ്ച പൂര്‍ത്തിയാവും

കൊച്ചി: സൗദി അറേബ്യയില്‍ വധശിക്ഷയ്ക്ക് വിധിക്കപ്പെട്ട് ജയിലില്‍ കഴിഞ്ഞിരുന്ന കോഴിക്കോട് കടലുണ്ടി സ്വദേശി അബ്ദുല്‍ റഹീം 20 വര്‍ഷത്തിന് ശേഷം മോചിതനാകുന്നു. ശിക്ഷാകാലാവധി ഈ മാസം 19ന് പൂര്‍ത്തിയാകുന്നതോടെ റഹീം സ്വാതന്ത്ര്യം നേടും. എന്നാല്‍ സൗദിയിലെ അവധിക്കാലം കാരണം പിന്നീട് മാത്രമേ നാട്ടിലേക്ക് മടങ്ങിയെത്തുകയുള്ളുവെന്ന് അബ്ദുല്‍ റഹീം നിയമ സഹായ സമിതി അറിയിച്ചു.

സൗദി ബാലന്റെ മരണവുമായി ബന്ധപ്പെട്ട കേസില്‍ റിയാദില്‍ തടവില്‍ കഴിഞ്ഞിരുന്ന റഹീമിന്റെ മോചനം വര്‍ഷങ്ങളായുള്ള നിയമ പോരാട്ടത്തിന്റെ ഫലമാണ്. ലോകമെമ്പാടുമുള്ള മലയാളികളുടെ കൂട്ടായ്മയിലൂടെ 34 കോടി രൂപ ദിയാധനം സമാഹരിച്ച് നല്‍കിയതോടെയാണ് വധശിക്ഷ ഒഴിവായത്. തുടര്‍ന്ന് മറ്റ് വകുപ്പുകളില്‍ 20 വര്‍ഷത്തെ തടവ് ശിക്ഷയാണ് അനുഭവിച്ചിരുന്നത്.

വര്‍ഷങ്ങളുടെ കാത്തിരിപ്പിനൊടുവില്‍ റഹീം നാട്ടിലേക്ക് മടങ്ങിവരുന്നതിന്റെ സന്തോഷത്തിലാണ് കുടുംബാംഗങ്ങള്‍. എന്നാല്‍ ഈ തിരിച്ചുവരവ് ആഘോഷമാക്കരുതെന്നും, സൗദി അറേബ്യയുടെ നിയമ സംവിധാനത്തെ അപമാനിക്കുന്ന തരത്തിലുള്ള പ്രതികരണങ്ങള്‍ ഒഴിവാക്കണമെന്നും നിയമ സഹായ സമിതി മുന്നറിയിപ്പ് നല്‍കി. ഇത്തരം പ്രവൃത്തികള്‍ കേസില്‍ തിരിച്ചടിയാകാമെന്നും, പ്രത്യേകിച്ച് സോഷ്യല്‍ മീഡിയ ഉപയോഗിക്കുമ്പോള്‍ ജാഗ്രത പാലിക്കണമെന്നും സമിതി വ്യക്തമാക്കി.