മന്ത്രിസ്ഥാനം വേണമെന്ന് കാപ്പന്‍; ടേം വ്യവസ്ഥ തള്ളിയിട്ട് കേരള കോണ്‍ഗ്രസ്

യുഡിഎഫ് മന്ത്രിസഭാ രൂപീകരണ ചര്‍ച്ചകള്‍ പുരോഗമിക്കുമ്പോള്‍ മന്ത്രിസ്ഥാനം സംബന്ധിച്ച് നിലപാട് കടുപ്പിച്ച് മാണി സി കാപ്പന്‍. ടേം വ്യവസ്ഥ അംഗീകരിക്കാനാവില്ലെന്നും, അഞ്ചുവര്‍ഷത്തേക്ക് പൂര്‍ണ മന്ത്രിസ്ഥാനം തന്നെ വേണമെന്നുമാണ് കാപ്പന്റെ ആവശ്യം. പാലായില്‍ നടന്ന പ്രചാരണത്തിനിടെ തന്നെ മന്ത്രിയാക്കുമെന്ന് വി ഡി സതീശനും രമേശ് ചെന്നിത്തലയും ഉറപ്പ് നല്‍കിയിരുന്നുവെന്നും, ആ വാക്ക് പാലിക്കണമെന്നുമാണ് കാപ്പന്‍ ആവശ്യപ്പെട്ടത്.

സീറോ മലങ്കര സഭാധ്യക്ഷന്‍ മേജര്‍ ആര്‍ച്ച് ബിഷപ് ബസേലിയോസ് മാര്‍ ക്ലിമ്മിസുമായി നടത്തിയ കൂടിക്കാഴ്ചയ്ക്ക് ശേഷമാണ് കാപ്പന്‍ പ്രതികരിച്ചത്. തെരഞ്ഞെടുപ്പ് വേളയില്‍ നല്‍കിയ വാഗ്ദാനങ്ങള്‍ മറക്കാനാവില്ലെന്നും, വണ്ടിയിലല്ല, കൊടി വച്ച കാറിലായിരിക്കും മടങ്ങുക എന്ന വി ഡി സതീശന്റെ പരാമര്‍ശവും അദ്ദേഹം ഓര്‍മ്മിപ്പിച്ചു. യുഡിഎഫ് ടീമിന്റെ ഭാഗമായതിനാല്‍ നീതിപൂര്‍വമായ പരിഗണന ലഭിക്കണമെന്നുമാണ് കാപ്പന്‍ വ്യക്തമാക്കി.

ഇതിനിടെ, കേരള കോണ്‍ഗ്രസ് വിഭാഗത്തിന് ഒരു മന്ത്രി സ്ഥാനവും ചീഫ് വിപ്പ് പദവിയും നല്‍കാനാണ് യുഡിഎഫില്‍ ആലോചന. രണ്ട് മന്ത്രിസ്ഥാനം അനുവദിക്കില്ലെന്ന നിലപാടോടെയാണ് ചര്‍ച്ചകള്‍ മുന്നോട്ടുപോകുന്നത്. അനൂപ് ജേക്കബിനും മാണി സി കാപ്പനും ടേം വ്യവസ്ഥയില്‍ മന്ത്രിസ്ഥാനം നല്‍കാനാണ് നിര്‍ദ്ദേശം, ആദ്യ ടേം അനൂപ് ജേക്കബിന് നല്‍കാനാണ് സാധ്യത.