പാമ്പുകടിയേറ്റ അനോഷിന്റെ നില മെച്ചപ്പെടുന്നു; വെന്റിലേറ്ററില്‍ നിന്ന് മാറ്റാന്‍ സാധ്യത

തൃശൂര്‍: തൃശൂരില്‍ പാമ്പുകടിയേറ്റ് ചികിത്സയില്‍ കഴിയുന്ന പത്തുവയസ്സുകാരന്‍ അനോഷിന്റെ ആരോഗ്യ നിലയില്‍ പുരോഗതി ഉണ്ടാകുന്നതായി ആശുപത്രി അധികൃതര്‍ അറിയിച്ചു. മരുന്നുകള്‍ക്കും ചികിത്സാ നിര്‍ദ്ദേശങ്ങള്‍ക്കും കുട്ടി നല്ല രീതിയില്‍ പ്രതികരിക്കുന്നുണ്ടെന്നും അവര്‍ വ്യക്തമാക്കി. കഴിഞ്ഞ ദിവസം പുറത്തിറക്കിയ മെഡിക്കല്‍ ബുള്ളറ്റിനില്‍ കുട്ടി കണ്ണ് തുറന്നതായി സൂചിപ്പിച്ചിരുന്നു.

വിദഗ്ധ ഡോക്ടര്‍മാരുടെ നിരീക്ഷണത്തിലാണ് അനോഷ് തുടരുന്നത്. ആരോഗ്യനില മെച്ചപ്പെട്ട സാഹചര്യത്തില്‍ ഉടന്‍ തന്നെ വെന്റിലേറ്ററില്‍ നിന്ന് മാറ്റാനാകുമെന്നാണ് ആശുപത്രി അധികൃതരുടെ പ്രതീക്ഷ. കുട്ടി സാധാരണ ജീവിതത്തിലേക്ക് തിരിച്ചെത്തുമെന്ന് കുടുംബവും പ്രതീക്ഷ പ്രകടിപ്പിച്ചു.

ഇതിനിടെ, കുട്ടിയുടെ വീടിനും പരിസര പ്രദേശങ്ങളിലും വനംവകുപ്പ് പരിശോധന നടത്തി. സമീപ പ്രദേശങ്ങളില്‍ പാമ്പുകളുടെ സാന്നിധ്യം കണ്ടെത്തിയതിനെ തുടര്‍ന്ന് അവയെ ഒഴിപ്പിക്കുന്നതിനായി തീ വെച്ച് നടപടികള്‍ സ്വീകരിച്ചു. നാട്ടുകാരുടെ നിര്‍ദ്ദേശപ്രകാരമാണ് ഈ നടപടികള്‍ സ്വീകരിച്ചതെന്ന് അധികൃതര്‍ അറിയിച്ചു.