കേരളത്തില്‍ വൈദ്യുതി ഉപഭോഗം റെക്കോര്‍ഡ് ഉയരത്തില്‍; ആശങ്കയില്‍ കെഎസ്ഇബി

തിരുവനന്തപുരം:  സംസ്ഥാനത്ത് ഉഷ്ണതരംഗത്തിന് സമാനമായ സാഹചര്യത്തില്‍ ചൂട് കഠിനമാകുന്നതോടെ വൈദ്യുതി ഉപഭോഗം റെക്കോര്‍ഡുകള്‍ ഭേദിച്ച് കുതിക്കുന്നു. ഏപ്രില്‍ 12-ന് സംസ്ഥാനത്തെ വൈദ്യുതി ആവശ്യകത ചരിത്രത്തിലെ ഏറ്റവും ഉയര്‍ന്ന നിരക്കായ 5,933 മെഗാവാട്ടിലെത്തി. ഇതോടെ കഴിഞ്ഞ മാര്‍ച്ചിലുണ്ടായ റെക്കോര്‍ഡാണ് പഴങ്കഥയായത്. അന്ന് രാത്രി മാത്രം കേരളം ആകെ ഉപയോഗിച്ചത് 112.16 ദശലക്ഷം യൂണിറ്റ് വൈദ്യുതിയാണ്.

ഉപഭോഗം ഇനിയും ഇത്തരത്തില്‍ വര്‍ധിച്ചാല്‍ നിലവിലെ വിതരണ ശൃംഖലയ്ക്ക് അത് താങ്ങാനാവില്ലെന്ന് കെഎസ്ഇബി (KSEB) ഉദ്യോഗസ്ഥര്‍ മുന്നറിയിപ്പ് നല്‍കുന്നു. പ്രത്യേകിച്ച് വടക്കന്‍ ജില്ലകളില്‍ ലോഡ് വര്‍ധിക്കുന്നത് ട്രാന്‍സ്‌ഫോര്‍മറുകളുടെ പ്രവര്‍ത്തനത്തെ ബാധിച്ചേക്കാം. ഇതേത്തുടര്‍ന്ന് പ്രാദേശികമായി വൈദ്യുതി നിയന്ത്രണങ്ങള്‍ ഏര്‍പ്പെടുത്തേണ്ടി വരുമെന്നും അധികൃതര്‍ സൂചിപ്പിച്ചു. വൈകുന്നേരം 6 മുതല്‍ രാത്രി 11 വരെയുള്ള സമയങ്ങളില്‍ അനാവശ്യമായ വൈദ്യുതി ഉപകരണങ്ങള്‍ ഒഴിവാക്കി സഹകരിക്കണമെന്ന് കെഎസ്ഇബി ജനങ്ങളോട് അഭ്യര്‍ത്ഥിച്ചു.