നാമനിര്‍ദേശ പത്രിക ഇന്ന് കൂടി സമര്‍പ്പിക്കാം; കേരളം പോളിങ് ബൂത്തിലെത്താന്‍ ഇനി 17 നാള്‍ മാത്രം

തിരുവനന്തപുരം:  കേരള നിയമസഭാ തിരഞ്ഞെടുപ്പിനുള്ള നാമനിര്‍ദ്ദേശ പത്രിക സമര്‍പ്പിക്കാനുള്ള സമയപരിധി ഇന്ന് അവസാനിക്കുന്നു. ഭൂരിഭാഗം സ്ഥാനാര്‍ത്ഥികളും കഴിഞ്ഞ ദിവസങ്ങളിലായി പത്രിക സമര്‍പ്പിച്ചു കഴിഞ്ഞു. ബാക്കിയുള്ള പ്രമുഖ സ്ഥാനാര്‍ത്ഥികളെല്ലാം ഇന്ന് അതത് വരണാധികാരികള്‍ക്ക് മുന്‍പാകെ പത്രിക സമര്‍പ്പിക്കും.

പുനലൂരിലെ യുഡിഎഫ് സ്ഥാനാര്‍ത്ഥി തര്‍ക്കം പരിഹരിക്കപ്പെട്ടതോടെ നൗഷാദ് യൂനുസ് ഇന്ന് പുനലൂര്‍ ആര്‍ടിഒ ഓഫീസില്‍ പത്രിക സമര്‍പ്പിക്കും. കരുനാഗപ്പള്ളിയിലെ എന്‍ഡിഎ സ്ഥാനാര്‍ത്ഥി ജിതിന്‍ ദേവിന്റെ പത്രികാ സമര്‍പ്പണ ചടങ്ങിലും തുടര്‍ന്നു നടക്കുന്ന റോഡ് ഷോയിലും പങ്കെടുക്കാന്‍ മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് എത്തും എന്നത് ഇന്നത്തെ പ്രധാന ആകര്‍ഷണമാണ്.

കൊട്ടാരക്കരയിലെ ആര്‍ രശ്മി (എന്‍ഡിഎ), ഇരവിപുരത്തെ വിഷ്ണു മോഹന്‍ (യുഡിഎഫ്), എം നൗഷാദ് (എല്‍ഡിഎഫ്), കൊല്ലത്തെ എസ് ജയമോഹന്‍ (എല്‍ഡിഎഫ്), ചടയമംഗലത്തെ എം എം നസീര്‍ (യുഡിഎഫ്), കുണ്ടറയിലെ റോബിന്‍ രാധാകൃഷ്ണന്‍ (എന്‍ഡിഎ), എസ് എല്‍ സജികുമാര്‍ (എല്‍ഡിഎഫ്) തുടങ്ങിയ പ്രമുഖരും ഇന്ന് പത്രിക സമര്‍പ്പിക്കുന്നവരുടെ പട്ടികയിലുണ്ട്.

140 മണ്ഡലങ്ങളിലും സ്ഥാനാര്‍ത്ഥി ചിത്രം വ്യക്തമായതോടെ സംസ്ഥാനം ആവേശകരമായ ഒരു പോരാട്ടത്തിലേക്കാണ് നീങ്ങുന്നത്. പത്ത് വര്‍ഷത്തെ ഭരണനേട്ടം ഉയര്‍ത്തിക്കാട്ടി മൂന്നാം തുടര്‍ഭരണത്തിനായി എല്‍ഡിഎഫും, ശക്തമായ തിരിച്ചുവരവിനായി യുഡിഎഫും, രാഷ്ട്രീയ മാറ്റം ലക്ഷ്യമിട്ട് എന്‍ഡിഎയും കളം നിറഞ്ഞു കഴിഞ്ഞു. വോട്ടെടുപ്പിന് ഇനി വെറും 17 ദിവസങ്ങള്‍ മാത്രമാണ് ബാക്കി.