രാഹുല്‍ ഗാന്ധിയുടെ ഗ്യാരണ്ടികള്‍ കേരളം മുഖവിലക്കെടുക്കില്ലെന്ന് മന്ത്രി പി രാജീവ്

തിരുവനന്തപുരം: രാഹുല്‍ ഗാന്ധി പ്രഖ്യാപിച്ച ഗ്യാരണ്ടികള്‍ കേരളത്തിലെ ജനങ്ങള്‍ മുഖവിലക്കെടുക്കില്ലെന്ന് മന്ത്രി പി രാജീവ്. സംസ്ഥാന സര്‍ക്കാരിന്റെ വികസന നേട്ടങ്ങള്‍ കണ്ടിട്ടും അന്ധത ബാധിച്ച നിലയിലാണ് ഇത്തരം ആരോപണങ്ങള്‍ ഉയരുന്നതെന്നും മന്ത്രി പറഞ്ഞു.

രാഹുല്‍ ഗാന്ധിയുടെ സിജെപി ആരോപണവുമായി ബന്ധപ്പെട്ട ചോദ്യത്തിന് പ്രതികരിക്കവേ, കെജ്രിവാളിനെ ജയിലില്‍ അടയ്ക്കാന്‍ ബിജെപിയുടെ ചട്ടുകമായ ആളാണ് രാഹുല്‍ ഗാന്ധിയെന്നായിരുന്നു മന്ത്രി പി രാജീവിന്റെ പ്രതികരണം. രാഹുല്‍ ഗാന്ധി ബിജെപി ഏജന്റായി പ്രവര്‍ത്തിക്കുന്നുവെന്നും അദ്ദേഹം ആരോപിച്ചു.

കെഎസ്ആര്‍ടിസിയെ ഇല്ലാതാക്കാന്‍ ശ്രമിച്ചവരുടെ വാഗ്ദാനങ്ങളില്‍ ജനങ്ങള്‍ ഇനി വിശ്വസിക്കില്ലെന്നും മന്ത്രി വ്യക്തമാക്കി. കര്‍ണാടകയിലും തെലങ്കാനയിലും നടക്കുന്നത് ബിജെപിയുടേതിന് സമാനമായ ന്യൂനപക്ഷ വേട്ടയാണെന്നും അദ്ദേഹം ആരോപിച്ചു.

നടന്‍ മമ്മൂട്ടിക്കെതിരായ സൈബര്‍ ആക്രമണത്തെയും മന്ത്രി തള്ളി. ആരെങ്കിലും എവിടെയെങ്കിലും നിന്ന് പറയുന്ന കാര്യങ്ങളല്ല പ്രധാനം, തിരക്കുകള്‍ക്കിടയിലും മമ്മൂട്ടി പരിപാടിയില്‍ എത്തിയത് ശ്രദ്ധിക്കേണ്ട കാര്യമാണെന്ന് അദ്ദേഹം പറഞ്ഞു. മമ്മൂട്ടി എത്തിയതോടെ പദ്ധതിയെക്കുറിച്ച് കൂടുതല്‍ ആളുകള്‍ അറിഞ്ഞുവെന്നും മന്ത്രി പി രാജീവ് കൂട്ടിച്ചേര്‍ത്തു.