വര്‍ഗീയതയ്ക്ക് എതിരെ പോരാടാന്‍ കോണ്‍ഗ്രസ് അല്ലാതെ മറ്റൊരു ബദല്‍ ഇല്ല: നടന്‍ പ്രേംകുമാര്‍

കോട്ടയം: കലാകാരന്മാര്‍ക്ക് അതിരുകളില്ലാത്ത ആവിഷ്‌കാര സ്വാതന്ത്ര്യം ഉണ്ടാകണമെന്ന് പ്രശസ്ത നടന്‍ പ്രേംകുമാര്‍. കോട്ടയത്ത് നടന്ന കെപിസിസി സംസ്‌കാര സാഹിതി പരിപാടിയില്‍ സംസാരിക്കുകയായിരുന്നു അദ്ദേഹം. മതത്തിന്റെയോ ജാതിയുടെയോ രാഷ്ട്രീയത്തിന്റെയോ യാതൊരുവിധ നിയന്ത്രണങ്ങളുമില്ലാതെ അഭിപ്രായം പറയാനുള്ള സാഹചര്യം ഇവിടെ ഉണ്ടാകണമെന്നും അദ്ദേഹം വ്യക്തമാക്കി. ജനാധിപത്യം ഇന്ന് അപകടകരമായ അവസ്ഥയിലാണെന്നും അദ്ദേഹം കൂട്ടിച്ചേര്‍ത്തു.

ഇന്ത്യയില്‍ രാഷ്ട്രീയ ഭൂരിപക്ഷം മാറിമറിഞ്ഞു വരുന്നത് സ്വാഭാവികമാണെന്നും എന്നാല്‍ വര്‍ഗീയ ഭൂരിപക്ഷം വര്‍ദ്ധിച്ചു വരുന്നത് വലിയ അപകടമാണെന്നും പ്രേംകുമാര്‍ ചൂണ്ടിക്കാട്ടി. അത്തരമൊരു മാറ്റമുണ്ടായാല്‍ അതിനെ തിരുത്തുക എളുപ്പമല്ല. കലാകാരന്റെ സ്വാതന്ത്ര്യം വെല്ലുവിളിക്കപ്പെടുന്നത് ഫാസിസത്തിന്റെ ലക്ഷണമാണ്. ആവിഷ്‌കാര സ്വാതന്ത്ര്യത്തിന് നേരെ ആര് കൈവെച്ചാലും അത് ഫാസിസമായി തന്നെ കാണണമെന്നും അദ്ദേഹം പറഞ്ഞു. പണ്ട് കലകളിലൂടെ ആവിഷ്‌കരിച്ചിരുന്ന പല കാര്യങ്ങളും ഇന്ന് നടപ്പിലാക്കാന്‍ സാധിക്കാത്ത അസഹിഷ്ണുതയുടെ കാലമാണിതെന്നും അദ്ദേഹം ഓര്‍മ്മിപ്പിച്ചു.

നെഹ്റുവിന്റെ വീക്ഷണങ്ങളാണ് ഇന്നും ഇന്ത്യയെ മുന്നോട്ട് നയിക്കുന്നതെന്ന് അദ്ദേഹം പറഞ്ഞു. വര്‍ഗീയതയ്‌ക്കെതിരെ പോരാടാന്‍ കോണ്‍ഗ്രസ് അല്ലാതെ മറ്റൊരു ബദല്‍ ഇന്ത്യയിലില്ല. വര്‍ഗീയതയെ പ്രതിരോധിക്കാന്‍ കോണ്‍ഗ്രസും സിപിഐഎമ്മും ഒന്നിച്ച് നില്‍ക്കണമെന്നും പ്രേംകുമാര്‍ ആഹ്വാനം ചെയ്തു. പരിപാടിയിലെ സദസ്സിനേക്കാള്‍ കൂടുതല്‍ ആളുകള്‍ വേദിയിലിരിക്കുന്നതിനെ തമാശരൂപേണ വിമര്‍ശിച്ച അദ്ദേഹം, അത് കോണ്‍ഗ്രസ് ശ്രദ്ധിക്കേണ്ട കാര്യമാണെങ്കിലും അത് ഓരോരുത്തരുടെയും സ്വാതന്ത്ര്യമാണെന്നും കൂട്ടിച്ചേര്‍ത്തു.

മറ്റുള്ളവര്‍ മൗനം പാലിച്ചപ്പോഴും സര്‍ക്കാരിനെ വിമര്‍ശിക്കാന്‍ ധൈര്യം കാണിച്ച വ്യക്തിയാണ് പ്രേംകുമാറെന്ന് ചടങ്ങില്‍ അധ്യക്ഷത വഹിച്ച സംസ്‌കാര സാഹിതി ചെയര്‍മാന്‍ സി.ആര്‍ മഹേഷ് എംഎല്‍എ പറഞ്ഞു. പ്രേംകുമാറിന് കോണ്‍ഗ്രസിനെ പോലും വിമര്‍ശിക്കാന്‍ അവകാശമുണ്ടെന്നും അതിനെ ആശയപരമായാണ് പാര്‍ട്ടി കാണുന്നതെന്നും അദ്ദേഹം വ്യക്തമാക്കി. കലാകാരന്മാര്‍ക്ക് ആരെയും വിമര്‍ശിക്കാനുള്ള സ്വാതന്ത്ര്യം മലയാളികള്‍ നല്‍കിയിട്ടുള്ളതാണെന്നും സി.ആര്‍ മഹേഷ് കൂട്ടിച്ചേര്‍ത്തു.