കടകംപളളിയുടെ വാദം പൊളിയുന്നു; പോറ്റിയുടെ വീട്ടില്‍ ഒന്നിലേറെ തവണ പോയതിന് തെളിവ്

തിരുവനന്തപുരം: ശബരിമല സ്വര്‍ണക്കൊള്ളക്കേസിലെ മുഖ്യപ്രതി ഉണ്ണികൃഷ്ണന്‍ പോറ്റിയുമായി തനിക്ക് കേവലം ഒരു തവണത്തെ പരിചയം മാത്രമേയുള്ളൂ എന്ന മുന്‍ ദേവസ്വം മന്ത്രി കടകംപള്ളി സുരേന്ദ്രന്റെ വാദം പൊളിയുന്നു. പോറ്റിയുടെ വീട്ടില്‍ കടകംപള്ളി ഒന്നിലേറെ തവണ സന്ദര്‍ശനം നടത്തിയതിന്റെ പുതിയ ചിത്രങ്ങള്‍ പുറത്തുവന്നതോടെ അന്വേഷണം പുതിയ തലത്തിലേക്ക് നീങ്ങുകയാണ്. ഉണ്ണികൃഷ്ണന്‍ പോറ്റിയുടെ സഹോദരിയുടെ മകള്‍ക്ക് റാങ്ക് ലഭിച്ചപ്പോള്‍ അഭിനന്ദിക്കാനായി വീട്ടിലെത്തി പേന സമ്മാനമായി നല്‍കുന്ന ചിത്രമാണ് ഏറ്റവും ഒടുവിലായി പുറത്തുവന്നിരിക്കുന്നത്. നേരത്തെ, ഗണ്‍മാനോട് ചോദിച്ച് ഉറപ്പുവരുത്തിയെന്നും ഔദ്യോഗികമായി ഒരു തവണ മാത്രമേ പോറ്റിയുടെ വീട്ടില്‍ പോയിട്ടുള്ളൂ എന്നുമായിരുന്നു കടകംപള്ളിയുടെ വിശദീകരണം. എന്നാല്‍, അയല്‍വാസികളുടെ മൊഴികളും പുതിയ ചിത്രങ്ങളും മന്ത്രിയുടെ വാദങ്ങളെ തള്ളുന്നതാണ്.

കേസിലെ ഉന്നതതല ബന്ധങ്ങളെക്കുറിച്ച് പ്രത്യേക അന്വേഷണ സംഘം  അന്വേഷണം ശക്തമാക്കിയിരിക്കുകയാണ്. ഇതിന്റെ ഭാഗമായി കടകംപള്ളി സുരേന്ദ്രനെ വീണ്ടും ചോദ്യം ചെയ്യാന്‍ വിളിപ്പിച്ചേക്കും. സ്വര്‍ണക്കൊള്ളയുമായി ബന്ധപ്പെട്ട് സാമ്പത്തിക ഇടപാടുകള്‍ നടന്നിട്ടുണ്ടോ എന്ന കാര്യത്തിലാണ് എസ്.ഐ.ടി വ്യക്തത തേടുന്നത്. ഇതിനിടെ, പത്തനംതിട്ട എം.പി ആന്റോ ആന്റണിയെയും ചോദ്യം ചെയ്യാനുള്ള നീക്കങ്ങള്‍ സജീവമാണ്. ഉണ്ണികൃഷ്ണന്‍ പോറ്റിയുമായി എം.പിക്ക് സാമ്പത്തിക ഇടപാടുകള്‍ ഉണ്ടോയെന്നും അന്വേഷണസംഘം പരിശോധിക്കുന്നുണ്ട്. തനിക്ക് സാമ്പത്തിക ബുദ്ധിമുട്ടുണ്ടായപ്പോള്‍ സഹായിച്ചിട്ടുണ്ടെന്ന് ആന്റോ ആന്റണി നേരത്തെ സൂചിപ്പിച്ചിരുന്നുവെങ്കിലും അത് തിരഞ്ഞെടുപ്പ് സഹായമായിരുന്നു എന്നാണ് അദ്ദേഹത്തിന്റെ വിശദീകരണം.

അതേസമയം, യു.ഡി.എഫ് കണ്‍വീനര്‍ അടൂര്‍ പ്രകാശിനെ കഴിഞ്ഞ ദിവസം ക്രൈംബ്രാഞ്ച് ആസ്ഥാനത്ത് രണ്ടര മണിക്കൂറോളം ചോദ്യം ചെയ്തു. ഉണ്ണികൃഷ്ണന്‍ പോറ്റിയുമായുള്ള ബന്ധത്തെക്കുറിച്ച് ചോദിച്ചുവെങ്കിലും സാമ്പത്തിക ഇടപാടുകളെക്കുറിച്ച് ചോദ്യങ്ങള്‍ ഉണ്ടായില്ലെന്ന് അദ്ദേഹം വ്യക്തമാക്കി. എന്നാല്‍, അടൂര്‍ പ്രകാശിന്റെ മൊഴികള്‍ വിശദമായി പരിശോധിച്ച ശേഷം അദ്ദേഹത്തെ വീണ്ടും വിളിപ്പിക്കാനാണ് സാധ്യത. പോറ്റിയും സ്വര്‍ണ വ്യാപാരി ഗോവര്‍ദ്ധനും സോണിയ ഗാന്ധിയെ സന്ദര്‍ശിച്ചപ്പോള്‍ അടൂര്‍ പ്രകാശും ആന്റോ ആന്റണിയും കൂടെയുണ്ടായിരുന്ന ചിത്രങ്ങളും വലിയ വിവാദമായിരുന്നു. പ്രതിക്ക് ജാമ്യം ലഭിച്ചതും അന്വേഷണം നീളുന്നതും രാഷ്ട്രീയ വിവാദങ്ങള്‍ക്ക് വഴിതെളിച്ചിട്ടുണ്ട്.