കാര്‍ ഇടച്ച് യുവാക്കള്‍ക്ക് പരുക്കേറ്റ സംഭവം: മണിയന്‍പിളള രാജു അറസ്റ്റില്‍

തിരുവനന്തപുരം: നഗരത്തില്‍ കാറിടിച്ച് നിര്‍ത്താതെ പോയ സംഭവത്തില്‍ പ്രശസ്ത സിനിമാ നടന്‍ മണിയന്‍പിള്ള രാജുവിനെ മ്യൂസിയം പോലീസ് അറസ്റ്റ് ചെയ്തു. അപകടത്തിന് ശേഷം നിര്‍ത്താതെ പോയതിനും അശ്രദ്ധമായി വാഹനമോടിച്ചതിനുമാണ് നടപടി. ജാമ്യം ലഭിക്കാവുന്ന വകുപ്പുകള്‍ പ്രകാരമാണ് കേസെടുത്തിരിക്കുന്നത്. അറസ്റ്റ് രേഖപ്പെടുത്തിയ ശേഷം അദ്ദേഹത്തെ വൈദ്യപരിശോധനയ്ക്ക് വിധേയനാക്കി.

കഴിഞ്ഞ ദിവസം രാത്രി ട്രിവാന്‍ഡ്രം ക്ലബ്ബിന് സമീപമായിരുന്നു അപകടം നടന്നത്. മണിയന്‍പിള്ള രാജു ഓടിച്ചിരുന്ന കാര്‍ ഇടിച്ച് ബൈക്ക് യാത്രക്കാരായ നിവേദിത് കൃഷ്ണ, സൂരജ് എന്നിവര്‍ക്ക് പരിക്കേറ്റു. റോഡിലേക്ക് തെറിച്ചുവീണ യുവാക്കളുടെ കാലിനും കഴുത്തിനും ഗുരുതരമായ പരിക്കുകളുണ്ട്. ഇവര്‍ നിലവില്‍ ആശുപത്രിയില്‍ ചികിത്സയിലാണ്. അപകടം നടന്നിട്ടും പരിക്കേറ്റവര്‍ക്ക് പ്രഥമ ശുശ്രൂഷ നല്‍കാനോ ആശുപത്രിയിലെത്തിക്കാനോ ശ്രമിക്കാതെ നടന്‍ വാഹനം ഓടിച്ചുപോയെന്നാണ് പരാതിയില്‍ പറയുന്നത്.

അതേസമയം, അപകടത്തില്‍ താന്‍ മനഃപൂര്‍വ്വം വീഴ്ച വരുത്തിയിട്ടില്ലെന്ന് മണിയന്‍പിള്ള രാജു പ്രതികരിച്ചു. ബൈക്ക് തന്റെ കാറില്‍ വന്നിടിക്കുകയായിരുന്നുവെന്നും സിസിടിവി ദൃശ്യങ്ങള്‍ പരിശോധിച്ചാല്‍ ഇത് വ്യക്തമാകുമെന്നും അദ്ദേഹം പറഞ്ഞു. കാറോടിച്ചത് ഞാന്‍ തന്നെയാണ്. ഞാന്‍ ഒരു ക്യാന്‍സര്‍ രോഗിയാണ്, കൂടാതെ ചിക്കന്‍ഗുനിയയും ബാധിച്ചിട്ടുണ്ട്. അപകടമുണ്ടായപ്പോള്‍ പെട്ടെന്നുണ്ടായ പരിഭ്രാന്തി കാരണമാണ് പുറത്തിറങ്ങാതിരുന്നത്. എന്നാല്‍ ഉടന്‍ തന്നെ സുഹൃത്തുക്കളെ വിളിച്ച് ആംബുലന്‍സ് ഏര്‍പ്പാടാക്കാന്‍ ആവശ്യപ്പെടുകയും രാവിലെ പോലീസിനെ വിവരം അറിയിക്കുകയും ചെയ്തിരുന്നു, അദ്ദേഹം വിശദീകരിച്ചു.

പരുക്കേറ്റ യുവാക്കളുടെ മൊഴിയുടെയും പരാതിയുടെയും അടിസ്ഥാനത്തിലാണ് മ്യൂസിയം പോലീസ് കേസെടുത്തത്. അപകട സ്ഥലത്തെ സിസിടിവി ദൃശ്യങ്ങള്‍ പോലീസ് ശേഖരിച്ചിട്ടുണ്ട്. സംഭവത്തില്‍ കൂടുതല്‍ അന്വേഷണം നടന്നുവരികയാണെന്ന് പോലീസ് വൃത്തങ്ങള്‍ അറിയിച്ചു.