ഡല്‍ഹി ചാവേര്‍ ആക്രമണം: പിന്നില്‍ അഫ്ഘാനിസ്ഥാന്‍- പാക് അധീന കശ്മീര്‍ കേന്ദ്രീകരിച്ച ജെയ്‌ഷെ ശൃംഖല

ന്യൂഡല്‍ഹി: ഡല്‍ഹിയില്‍ അടുത്തിടെ നടന്ന ചാവേര്‍ ആക്രമണത്തിന് പിന്നില്‍ അഫ്ഗാനിസ്ഥാന്‍, പാക് അധീന കശ്മീര്‍ എന്നിവിടങ്ങളില്‍ കേന്ദ്രീകരിച്ചുള്ള ജെയ്ഷെ മുഹമ്മദ് ഭീകര ശൃംഖലയാണെന്ന് അന്വേഷണ ഏജന്‍സികളുടെ കണ്ടെത്തല്‍. ആക്രമണത്തിന് നിര്‍ദ്ദേശം നല്‍കിയ മൂന്ന് പ്രധാന സൂത്രധാരന്മാരെ തിരിച്ചറിഞ്ഞതായും വിവരമുണ്ട്.

ഭീകരസംഘത്തിലെ പ്രധാനികളായ ഫൈസല്‍ ഇഷ്ഫാഖ് ഭട്ട്, ഡോ. ഉകാസ, കൂടാതെ ഹാഷിം എന്നിവരെയാണ് അന്വേഷണ ഏജന്‍സികള്‍ തിരിച്ചറിഞ്ഞത്. ഇവര്‍ നിലവില്‍ പാക് അധീന കശ്മീരിലും അഫ്ഗാനിസ്ഥാനിലുമാണ് ഉള്ളതെന്നാണ് കണ്ടെത്തല്‍. ആക്രമണത്തിന് തൊട്ടുമുമ്പ് ചാവേറായ ഡോ. ഉമര്‍ നബി ഈ സംഘാംഗങ്ങളുമായി ഫോണില്‍ സംസാരിച്ചിരുന്നു. നിര്‍ദ്ദേശങ്ങളും ഏകോപനവും പ്രധാനമായും നടത്തിയത് സമൂഹമാധ്യമമായ ടെലിഗ്രാം ചാറ്റുകള്‍ വഴിയായിരുന്നു. ജെയ്ഷെ മുഹമ്മദ് ഹാന്‍ഡ്ലറായ ഹന്‍സുല്ലയുടെ ടെലിഗ്രാം ഗ്രൂപ്പില്‍ ആരിഫ് നിസാര്‍ എന്നയാള്‍ സജീവമാണെന്നും കണ്ടെത്തി.

ഭീകരബന്ധം സംശയിക്കുന്നവരുടെ 2 ലക്ഷത്തിലധികം രൂപയുടെ ബാങ്ക് അക്കൗണ്ടുകള്‍ അന്വേഷണ ഏജന്‍സികള്‍ മരവിപ്പിച്ചു. കോളുകള്‍, ചാറ്റുകള്‍, ഫണ്ട് റൂട്ടുകള്‍ എന്നിവയുടെ ഡിജിറ്റല്‍ പാതകള്‍ പരിശോധിക്കുന്നത് തുടരുകയാണ്.