തിരുവനന്തപുരം ഡിസിസി അധ്യക്ഷന്‍ എന്‍. ശക്തന്‍ രാജിവെച്ചു; രാജി സ്വീകരിക്കാതെ കെപിസിസി

തിരുവനന്തപുരം: തിരുവനന്തപുരം ജില്ലാ കോണ്‍ഗ്രസ് കമ്മിറ്റി (ഡിസിസി) അധ്യക്ഷ സ്ഥാനത്തുനിന്ന് എന്‍. ശക്തന്‍ രാജിവെച്ചു. കെപിസിസി നേതൃത്വത്തിന് അദ്ദേഹം രാജിക്കത്ത് കൈമാറി. എന്നാല്‍, കെപിസിസി നേതൃത്വം നിലവില്‍ രാജി സ്വീകരിച്ചിട്ടില്ല. കെപിസിസി പ്രസിഡന്റ് ഉള്‍പ്പെടെയുള്ളവര്‍ ശക്തനുമായി അനുനയ ചര്‍ച്ചകള്‍ക്ക് ഒരുങ്ങുകയാണ്.

കെപിസിസി വൈസ് പ്രസിഡന്റായിരുന്ന എന്‍. ശക്തനെ, പാലോട് രവി രാജിവെച്ചതിനെത്തുടര്‍ന്ന് പത്ത് ദിവസത്തേക്കെന്നു പറഞ്ഞാണ് ഡിസിസി പ്രസിഡന്റിന്റെ താല്‍ക്കാലിക ചുമതല ഏല്‍പ്പിച്ചത്. എന്നാല്‍ മൂന്ന് മാസമായിട്ടും അദ്ദേഹത്തെ ചുമതലയില്‍ നിന്ന് ഒഴിവാക്കാത്ത സാഹചര്യത്തിലാണ് ശക്തന്‍ രാജി സമര്‍പ്പിച്ചത്. താല്‍ക്കാലിക ഡിസിസി പ്രസിഡന്റ് സ്ഥാനത്തു നിന്ന് ഒഴിവാക്കണമെന്നും കെപിസിസി വൈസ് പ്രസിഡന്റ് പദവി തിരികെ വേണമെന്നും ആവശ്യപ്പെട്ട് എന്‍.ശക്തന്‍ നേതൃത്വത്തെ നേരത്തെ സമീപിച്ചിരുന്നു. 

നിയമസഭാ തിരഞ്ഞെടുപ്പില്‍ മത്സരിക്കാന്‍ ശക്തന്‍ താല്‍പര്യപ്പെടുന്നുണ്ട്. ഈ സാഹചര്യത്തില്‍, ഡിസിസി പ്രസിഡന്റിന്റെ ചുമതല വഹിക്കുന്നത് ജില്ലയിലാകെ പൂര്‍ണ്ണ ശ്രദ്ധ ആവശ്യമുള്ള ഉത്തരവാദിത്തമാണ്. തദ്ദേശ സ്വയംഭരണ, നിയമസഭാ തിരഞ്ഞെടുപ്പുകള്‍ അടുത്തിരിക്കെ, തന്നെക്കാള്‍ സജീവമായി ഇടപെടാന്‍ കഴിയുന്ന ഒരാള്‍ ഡിസിസി പ്രസിഡന്റ് സ്ഥാനത്തേക്ക് വരണം എന്ന അഭിപ്രായമാണ് അദ്ദേഹം നേതൃത്വത്തെ അറിയിച്ചിരിക്കുന്നത്. ശക്തന്റെ രാജിയില്‍ ഉടന്‍ തീരുമാനമെടുക്കാതെ, അദ്ദേഹവുമായി ചര്‍ച്ചകള്‍ നടത്താനാണ് കെപിസിസി അധ്യക്ഷന്‍ ഉള്‍പ്പെടെയുള്ളവരുടെ തീരുമാനം.