ഇനി പരാതി നല്‍കിയില്ലെന്ന് ആരും പറയരുത്; നടപടി ഉണ്ടാകുമോ?, പി.ശശിക്കെതിരെ പരാതി എഴുതി നല്‍കി അന്‍വര്‍

മലപ്പുറം: മുഖ്യമന്ത്രിയുടെ പൊളിറ്റിക്കല്‍ സെക്രട്ടറി പി. ശശിക്കെതിരെ സി.പി.എമ്മിന് പരാതി എഴുതി നല്‍കി പി.വി. അന്‍വര്‍ എം.എല്‍.എ. ഇന്റലിജന്‍സ് റിപ്പോര്‍ട്ട് പൂഴ്ത്തിവെച്ചു, എ.ഡി.ജി.പി അജിത് കുമാറിനായി പലതും വഴിവിട്ടു ചെയ്യുന്നു തുടങ്ങി ഗുരുതര ആരോപണങ്ങളാണ് ശശിക്കെതിരെ അന്‍വര്‍ ഉന്നയിച്ചിരുന്നത്.

അന്‍വര്‍ പരാതി എഴുതി നല്‍കിയാല്‍ പരിശോധിക്കുമെന്നായിരുന്നു സി.പി.എം സംസ്ഥാന സെക്രട്ടറി എം.വി. ഗോവിന്ദന്‍ പറഞ്ഞിരുന്നത്. ദൂതന്‍ മുഖേനയാണ് പരാതി പാര്‍ട്ടിക്ക് കൈമാറിയത്.

എം.വി. ഗോവിന്ദന്‍ നിലവില്‍ ആസ്ട്രേലിയയിലാണ്. മടങ്ങി എത്തിയശേഷമാകും തുടര്‍നടപടികളുണ്ടാവുക. എ.ഡി.ജി.പിക്കെതിരായ വിമര്‍ശനങ്ങള്‍ ഉന്നയിക്കുന്നതിനൊപ്പമായിരുന്നു ശശിക്കെതിരെയുള്ള ആരോപണങ്ങളും.

എ.ഡി.ജി.പിക്ക് വേണ്ട സഹായം ചെയ്തു കൊടുക്കുന്നത് ശശി ആണെന്നായിരുന്നു വിമര്‍ശനം. മലപ്പുറം എസ്പി സുജിത്ദാസിനും എ.ഡി.ജി.പിക്കും എതിരെയാണ് ആദ്യം പരാതി എഴുതിനല്‍കിയിരുന്നത്.