ദീപിക മുഖപ്രസംഗത്തിന് ജയരാജന്റെ മറുപടി; ഐഎസിലേക്ക് ഇപ്പോള്‍ കേരളത്തില്‍ നിന്ന് റിക്രൂട്ട്‌മെന്റ് നടത്തുന്നതായി എവിടെയും പറഞ്ഞിട്ടില്ല

കണ്ണൂര്‍: പൊളിറ്റിക്കല്‍ ഇസ്ലാം പ്രസ്താവന വിവാദമായതിന് പിന്നാലെ പ്രതികരണവുമായി പി ജയരാജന്‍. അഭിമുഖത്തിലെ ഒരു ഭാഗം വളച്ചൊടിച്ചുവെന്നാണ് പി.ജയരാജന്റെ വിശദീകരണം. ഐഎസിലേക്ക് ഇപ്പോള്‍ കേരളത്തില്‍ നിന്ന് റിക്രൂട്ട്‌മെന്റ് നടത്തുന്നതായി എവിടെയും പറഞ്ഞിട്ടില്ലെന്നും മുമ്പ് വിരലില്‍ എണ്ണാവുന്നവരെ റിക്രൂട്ട് ചെയ്തു എന്ന് പറഞ്ഞതില്‍ ഉറച്ചുനില്‍ക്കുന്നുവെന്നും ജയരാജന്‍ പറഞ്ഞു.

ദീപിക മുഖപ്രസംഗത്തിനാണ് ജയരാജന്റെ മറുപടി. രാഷ്ട്രീയ ഇസ്ലാമിനെ സി.പി.എം എപ്പോഴും അകറ്റി നിര്‍ത്തിയിട്ടുണ്ട്. ആഗോള സമാധാനത്തിന്റെ യഥാര്‍ത്ഥ ഭീഷണി ഇസ്ലാമിക തീവ്രവാദമെന്ന വാചകത്തോട് ശക്തമായ വിയോജിപ്പാണുള്ളത്. ഇങ്ങനെ പറയുന്നത് മരം മറഞ്ഞു കാട് കാണാതിരിക്കലെന്നും ജയരാജന്‍ പ്രതികരിച്ചു.

കേരളത്തില്‍ നിന്ന് മത ഭീകരവാദ സംഘടനകളിലേക്ക് യുവാക്കള്‍ പോകുന്നതിനെ ഗൗരവത്തിലെടുക്കണമെന്ന പി.ജയരാജന്റെ പ്രസ്താവനയാണ് വിവാദമായത്. പി.ജയരാജന്റെ വാദം തള്ളിയ ഇ.പി. ജയരാജന്‍ തീവ്രവാദ സംഘങ്ങള്‍ക്ക് കടന്നുവരാന്‍ കഴിയാത്ത സ്ഥലമാണ് കേരളമെന്ന് പ്രതികരിച്ചു.

മുതിര്‍ന്ന നേതാവിന്റെ പ്രസ്താവനയില്‍ സര്‍ക്കാര്‍ വ്യക്തത വരുത്തണമെന്ന് കോണ്‍ഗ്രസ് ആവശ്യപ്പെട്ടു. ഇസ്ലാമിക തീവ്രവാദത്തിന്റെ മുഖംമൂടി മാറ്റാന്‍ ജയരാജനെപ്പോലെ ആരെങ്കിലുമൊക്കെ വരുന്നതാണ് പ്രതീക്ഷയെന്നായിരുന്നു കത്തോലിക്കാ സഭ മുഖപത്രമായ ദീപികയുടെ മുഖപ്രസംഗം.