മാസപ്പടി കേസ് രാഷ്ട്രീയ പ്രേരിതം; ഇഡി അന്വേഷണം തുടരുന്നതില്‍ തെറ്റില്ലെന്ന് എ.കെ. ബാലന്‍

തിരുവനന്തപുരം: മാസപ്പടി കേസ് ആഭ്യന്തരമന്ത്രി രമേശ് ചെന്നിത്തലയെ ലക്ഷ്യമിട്ടാണ് ഉയര്‍ന്നുവന്നതെന്ന് സിപിഐഎം നേതാവ് എ.കെ. ബാലന്‍ ആരോപിച്ചു. വീണാ ടി.യെ ചോദ്യം ചെയ്യുന്നതില്‍ അസ്വാഭാവികതയൊന്നുമില്ലെന്നും, തെറ്റ് ചെയ്തവര്‍ നിയമനടപടികള്‍ നേരിടട്ടെയെന്നും അദ്ദേഹം പറഞ്ഞു.

പിണറായി വിജയനെയോ വീണാ ടിയെയോ പ്രതിയാക്കി ഇഡിയുടെ മുന്നില്‍ ഏതെങ്കിലും കേസ് നിലവിലുണ്ടോയെന്ന് ചോദിച്ച എ.കെ. ബാലന്‍, മാസപ്പടി കേസിന് തുടക്കമിട്ടത് മാത്യു കുഴല്‍നാടനാണെന്നും ചൂണ്ടിക്കാട്ടി. വിഷയം വിജിലന്‍സ് കോടതി തള്ളിയതിനു പിന്നാലെ ഹൈക്കോടതിയും പിന്നീട് സുപ്രീം കോടതിയും ഹര്‍ജികള്‍ തള്ളിയിരുന്നുവെന്നും അദ്ദേഹം പറഞ്ഞു. ആരോപണങ്ങള്‍ രാഷ്ട്രീയ പ്രേരിതമാണെന്ന് കോടതികള്‍ കണ്ടെത്തിയതായും അദ്ദേഹം അവകാശപ്പെട്ടു.

മാത്യു കുഴല്‍നാടന് ശേഷം ഷോണ്‍ ജോര്‍ജ് വിഷയത്തില്‍ രംഗത്തെത്തിയെന്നും, തുടര്‍ന്ന് എസ്എഫ്‌ഐഒയും പിന്നീട് ഇഡിയും അന്വേഷണം ആരംഭിച്ചെന്നും എ.കെ. ബാലന്‍ പറഞ്ഞു. കള്ളപ്പണം വെളുപ്പിക്കല്‍ നടന്നിട്ടുണ്ടെങ്കില്‍ അത് അന്വേഷിച്ച് കണ്ടെത്തുകയും കുറ്റക്കാര്‍ക്കെതിരെ നടപടി സ്വീകരിക്കുകയും ചെയ്യട്ടെയെന്നും അദ്ദേഹം കൂട്ടിച്ചേര്‍ത്തു.

2002-ലും 2013-ലും കരിമണല്‍ ഖനനത്തിന് സിഎംആര്‍എല്ലിന് അനുമതി നല്‍കിയിരുന്നത് അന്നത്തെ സര്‍ക്കാര്‍ ആയിരുന്നുവെന്നും, പിന്നീട് അത് റദ്ദാക്കിയത് വി.എസ്. അച്യുതാനന്ദന്‍ സര്‍ക്കാരാണെന്നും എ.കെ. ബാലന്‍ പറഞ്ഞു.