കേന്ദ്രത്തെ വെള്ളപൂശുന്ന ധവളപത്രം; യുഡിഎഫ് സര്‍ക്കാരിനെതിരെ തോമസ് ഐസക്ക്

തിരുവനന്തപുരം: സംസ്ഥാന സര്‍ക്കാര്‍ പുറത്തിറക്കിയ ധവളപത്രം കേന്ദ്ര സര്‍ക്കാരിനെ വെള്ളപൂശുന്നതാണെന്ന് മുന്‍ ധനമന്ത്രി തോമസ് ഐസക്ക് ആരോപിച്ചു. സംസ്ഥാനത്തെ സാമ്പത്തിക പ്രതിസന്ധിയുടെ യഥാര്‍ഥ കാരണങ്ങള്‍ വ്യക്തമാക്കുന്നതില്‍ ധവളപത്രം പരാജയപ്പെട്ടുവെന്നും അദ്ദേഹം വിമര്‍ശിച്ചു.

സംസ്ഥാനത്ത് വിലക്കയറ്റം നിയന്ത്രിക്കുന്നതിന് യുഡിഎഫ് സര്‍ക്കാര്‍ എന്ത് നടപടിയാണ് സ്വീകരിച്ചതെന്നും സംസ്ഥാന നികുതികളില്‍ ഇളവ് നല്‍കിയിട്ടുണ്ടോയെന്നും തോമസ് ഐസക്ക് ചോദിച്ചു. പെട്രോളിന്റെ വില 100 രൂപയില്‍ നിന്ന് 115 രൂപയായി ഉയര്‍ന്നതും ഉടന്‍ 120 രൂപയിലേക്ക് എത്താനിടയുണ്ടെന്നും അദ്ദേഹം ചൂണ്ടിക്കാട്ടി. ഇതിലൂടെ സര്‍ക്കാരിന് ആയിരക്കണക്കിന് കോടി രൂപയുടെ അധിക നികുതി വരുമാനം ലഭിക്കുമെന്നും അതില്‍ ഒരു ഭാഗമെങ്കിലും ജനങ്ങള്‍ക്ക് ആശ്വാസമായി നല്‍കണമെന്നും അദ്ദേഹം ആവശ്യപ്പെട്ടു.

നികുതി ഇളവ് നല്‍കണമെന്ന ആവശ്യം ഉന്നയിച്ചപ്പോള്‍ അത് മണ്ടത്തരമാണെന്ന നിലപാടാണ് മുഖ്യമന്ത്രി സ്വീകരിച്ചതെന്നും തോമസ് ഐസക്ക് ആരോപിച്ചു. ജനങ്ങള്‍ക്ക് നികുതി ഇളവ് നല്‍കുന്നത് മണ്ടത്തരമല്ലെന്നും എല്‍ഡിഎഫ് ഭരണകാലവും നിലവിലെ ഭരണകാലവും തമ്മില്‍ വലിയ കാലവ്യത്യാസമില്ലെന്ന കാര്യം മുഖ്യമന്ത്രി ഓര്‍ക്കണമെന്നും അദ്ദേഹം പറഞ്ഞു.

സംസ്ഥാനത്ത് സാമ്പത്തിക പ്രതിസന്ധിയുണ്ടെന്ന വിലയിരുത്തലിനോട് യോജിക്കുന്നുണ്ടെങ്കിലും അതിന്റെ അടിസ്ഥാന കാരണങ്ങളെക്കുറിച്ച് ധവളപത്രം മൗനം പാലിക്കുകയാണെന്നും അദ്ദേഹം വിമര്‍ശിച്ചു. കേന്ദ്ര സര്‍ക്കാരിന്റെ നയങ്ങളാണ് സംസ്ഥാനത്തിന്റെ സാമ്പത്തിക ബുദ്ധിമുട്ടുകള്‍ക്ക് പ്രധാന കാരണമെന്നും എന്നാല്‍ അതിനെക്കുറിച്ച് ധവളപത്രത്തില്‍ വ്യക്തമായ പരാമര്‍ശങ്ങളില്ലെന്നും തോമസ് ഐസക്ക് ആരോപിച്ചു.

കേന്ദ്ര സര്‍ക്കാരിനെതിരെ ശക്തമായ നിലപാട് സ്വീകരിക്കാനും കേന്ദ്ര വിരുദ്ധ സമരത്തിന് നേതൃത്വം നല്‍കാനും യുഡിഎഫ് സര്‍ക്കാര്‍ തയ്യാറാണോയെന്നും അദ്ദേഹം ചോദിച്ചു.