പിണറായിയെ മാത്രം കുറ്റപ്പെടുത്തുന്നത് നീതികേട്; സി.പി.ഐ.എം ആത്മപരിശോധന നടത്തണമെന്ന് വെള്ളാപ്പള്ളി

തിരുവനന്തപുരം: തെരഞ്ഞെടുപ്പ് തോല്‍വിയുടെ മുഴുവന്‍ ഉത്തരവാദിത്വവും പ്രതിപക്ഷനേതാവ് പിണറായി വിജയന്റെ മേല്‍ ചുമത്തുന്നത് നീതികേടാണെന്ന് എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. എസ്.എന്‍.ഡി.പി മുഖപത്രമായ യോഗനാദം പ്രസിദ്ധീകരിച്ച എഡിറ്റോറിയലിലൂടെയാണ് അദ്ദേഹം ഈ നിലപാട് വ്യക്തമാക്കിയത്.

പത്ത് വര്‍ഷക്കാലം പിണറായി വിജയനെ നേതാവായും ക്യാപ്റ്റനായും പാര്‍ട്ടിയുടെ മുഖമായും വാഴ്ത്തിപ്പാടിയവര്‍, തോല്‍വിക്ക് പിന്നാലെ അദ്ദേഹത്തിനെതിരെ വിമര്‍ശനശരങ്ങള്‍ എറിയുന്നതാണ് ഇപ്പോള്‍ കാണുന്നതെന്ന് വെള്ളാപ്പള്ളി ചൂണ്ടിക്കാട്ടി. ഒരു വ്യക്തിയെ മാത്രം കുറ്റപ്പെടുത്തി പ്രശ്‌നങ്ങള്‍ പരിഹരിക്കാനാകില്ലെന്നും അദ്ദേഹം അഭിപ്രായപ്പെട്ടു.

സി.പി.ഐ.എം ആത്മപരിശോധനയും സ്വയംവിമര്‍ശനവും നടത്തേണ്ട സമയമാണിതെന്നും എഡിറ്റോറിയലില്‍ പറയുന്നു. പാര്‍ട്ടി ഓഫീസുകള്‍ ദല്ലാളുമാരും കച്ചവട താല്‍പര്യക്കാരും കൈയടക്കിയെന്നാണ് വിമര്‍ശനം. അധികാരത്തിന്റെ ലഹരിയില്‍ പാര്‍ട്ടി നേതാക്കളും പ്രവര്‍ത്തകരും സാധാരണ ജനങ്ങളില്‍ നിന്ന് അകന്നുപോയെന്നും അദ്ദേഹം ആരോപിച്ചു.

വിദ്യാര്‍ഥി നേതാക്കള്‍ മുതല്‍ ബ്രാഞ്ച്, ലോക്കല്‍, ഏരിയ സെക്രട്ടറിമാര്‍ വരെയുള്ള പല തലങ്ങളിലുമുള്ള നേതാക്കള്‍ അഹങ്കാരപരമായ സമീപനം സ്വീകരിച്ചിരുന്നുവെന്നും വെള്ളാപ്പള്ളി വിമര്‍ശിച്ചു. ജനങ്ങളുമായുള്ള ബന്ധം നഷ്ടപ്പെട്ടതാണ് പാര്‍ട്ടിക്ക് തിരിച്ചടിയായതെന്നും, സംഘടനാപരമായ തിരുത്തലുകള്‍ അനിവാര്യമാണെന്നും അദ്ദേഹം അഭിപ്രായപ്പെട്ടു.