മാസപ്പടി കേസ്: വീണയ്ക്ക് നോട്ടീസ് അയക്കുന്നത് താത്കാലികമായി മാറ്റിവെച്ച് ഇഡി

കൊച്ചി: മാസപ്പടി കേസില്‍ മുഖ്യമന്ത്രി പിണറായി വിജയന്റെ മകള്‍ വീണ ടി.ക്കെതിരെ വെള്ളിയാഴ്ച വരെ പുതിയ നോട്ടീസ് നല്‍കില്ലെന്ന് എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി). കേസുമായി ബന്ധപ്പെട്ട തുടര്‍നടപടികള്‍ ഹൈക്കോടതി ഡിവിഷന്‍ ബെഞ്ചിന്റെ അന്തിമവിധിക്ക് ശേഷം മതിയെന്ന നിലപാടിലാണ് അന്വേഷണ ഏജന്‍സി

സിഎംആര്‍എല്‍ കമ്പനി നല്‍കിയ ഹര്‍ജിയില്‍ വെള്ളിയാഴ്ചയാണ് ഹൈക്കോടതി ഡിവിഷന്‍ ബെഞ്ച് വിധി പറയുന്നത്. ഇഡി അന്വേഷണം സ്റ്റേ ചെയ്യണമെന്ന ആവശ്യമാണ് ഹര്‍ജിയിലുള്ളത്. കോടതി ഉത്തരവ് അനുകൂലമായാല്‍ കേസില്‍ വേഗത്തിലുള്ള തുടര്‍നടപടികള്‍ സ്വീകരിക്കുമെന്നാണ് ഇഡി വൃത്തങ്ങള്‍ നല്‍കുന്ന സൂചന. നിലവില്‍ വീണയെ ചോദ്യം ചെയ്യുന്നതിനോ സമന്‍സ് അയക്കുന്നതിനോ നിയമതടസങ്ങളില്ലെങ്കിലും കോടതി വിധി കാത്തിരിക്കാനാണ് ഇഡിയുടെ തീരുമാനം.

അതേസമയം, തിരുവനന്തപുരം ക്ലിഫ് ഹൗസിന് സമീപം ഇഡി ഉദ്യോഗസ്ഥര്‍ക്ക് നേരെയുണ്ടായ ആക്രമണവുമായി ബന്ധപ്പെട്ട കേസും ശക്തമാക്കാനുള്ള നീക്കത്തിലാണ് ഇഡി. നിലവില്‍ താഴെത്തട്ടിലെ സിപിഎം പ്രവര്‍ത്തകര്‍ മാത്രമാണ് കേസില്‍ പ്രതികളായിട്ടുള്ളത്. എന്നാല്‍ സംസ്ഥാന സെക്രട്ടറി ഉള്‍പ്പെടെയുള്ള മുതിര്‍ന്ന നേതാക്കളും എംപിമാരും എംഎല്‍എമാരും സംഭവസ്ഥലത്ത് ഉണ്ടായിരുന്നുവെന്നും ആക്രമണത്തിലേക്ക് നയിച്ച സാഹചര്യങ്ങളില്‍ അവരുടെ പങ്കും പരിശോധിക്കണമെന്നുമാണ് ഇഡിയുടെ നിലപാട്.

ആക്രമണക്കേസില്‍ അറസ്റ്റിലായ പ്രതികളുടെ ജാമ്യാപേക്ഷ പരിഗണിക്കുമ്പോള്‍ കക്ഷിചേരാന്‍ ഇഡി ആലോചിക്കുന്നതായാണ് വിവരം. ഇതിന്റെ ഭാഗമായി സംഭവവുമായി ബന്ധപ്പെട്ട ദൃശ്യങ്ങളും മറ്റ് തെളിവുകളും ശേഖരിക്കുന്ന നടപടികള്‍ അന്വേഷണ ഏജന്‍സി ആരംഭിച്ചിട്ടുണ്ട്.