വന്ദേമാതരം പൂര്‍ണമായി ആലപിക്കാത്തത് വിവാദത്തില്‍; സര്‍ക്കാരിനെതിരെ ബിജെപി

തിരുവനന്തപുരം: നിയമസഭയിലെ ഗവര്‍ണറുടെ നയപ്രഖ്യാപന ചടങ്ങിനിടെ വന്ദേമാതരം പൂര്‍ണമായി ആലപിക്കാത്തത് രാഷ്ട്രീയ വിവാദമായി. ലോക്ഭവനില്‍നിന്ന് വന്ദേമാതരം മുഴുവനായും ആലപിക്കണമെന്ന നിര്‍ദേശം സംസ്ഥാന സര്‍ക്കാര്‍ തള്ളിയതോടെയാണ് വിവാദം ശക്തമായത്.

ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കറുടെ നയപ്രഖ്യാപനത്തിന് മുന്നോടിയും ശേഷവും പൊലീസ് ബാന്‍ഡ് വായിച്ചത് വന്ദേമാതരത്തിന്റെ ആദ്യഭാഗം മാത്രമായിരുന്നു. ഇക്കാര്യം സ്പീക്കറുടെ ശ്രദ്ധയില്‍പ്പെടുത്തിയതായി ഗവര്‍ണര്‍ വ്യക്തമാക്കി.

സംഭവത്തില്‍ സംസ്ഥാന സര്‍ക്കാരിനെതിരെ ബിജെപി രംഗത്തെത്തി. ലോക്ഭവനേയും ഗവര്‍ണറേയും സര്‍ക്കാര്‍ അവഹേളിച്ചുവെന്നും സിപിഐഎമ്മും ജമാഅത്തെ ഇസ്‌ലാമിയും മുന്നോട്ട് വയ്ക്കുന്ന നിലപാടുകള്‍ക്ക് സര്‍ക്കാര്‍ വഴങ്ങിയെന്നുമാണ് ബിജെപി നേതാവ് വി മുരളീധരന്‍ എംഎല്‍എ ആരോപിച്ചത്.

മുഖ്യമന്ത്രി വി ഡി സതീശന്‍ ജമാഅത്തെ ഇസ്‌ലാമിയുടെ നിര്‍ദേശപ്രകാരമാണ് പ്രവര്‍ത്തിക്കുന്നതെന്നും അദ്ദേഹം വിമര്‍ശിച്ചു. 1896-ല്‍ രൂപം കൊണ്ട വന്ദേമാതരം ആദ്യമായി ആലപിച്ചത് കോണ്‍ഗ്രസ് എഐസിസി സമ്മേളനത്തിലായിരുന്നുവെന്നും, ഇപ്പോള്‍ കോണ്‍ഗ്രസ് നിലപാട് മാറിയതെന്തുകൊണ്ടാണെന്ന് വ്യക്തമാക്കണമെന്നും വി മുരളീധരന്‍ ആവശ്യപ്പെട്ടു.