സംസ്ഥാനത്ത് വൈദ്യുതി പ്രതിസന്ധി പരിഹരിച്ചു; ഇനി തടസമില്ലെന്ന് മന്ത്രി കെ. കൃഷ്ണന്‍കുട്ടി

തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധി പരിഹരിച്ചതായി വൈദ്യുതി മന്ത്രി കെ. കൃഷ്ണന്‍കുട്ടി അറിയിച്ചു. ഇന്നുമുതല്‍ വൈദ്യുതി തടസങ്ങള്‍ ഉണ്ടാകില്ലെന്നും കേന്ദ്രത്തില്‍നിന്ന് ആവശ്യമായ വൈദ്യുതി ലഭിക്കുമെന്ന് ഉറപ്പ് ലഭിച്ചതായും മന്ത്രി വ്യക്തമാക്കി.

ഇടുത്ത ദിവസങ്ങളില്‍ ഉണ്ടായ വൈദ്യുതി മുടക്കങ്ങള്‍ ലോഡ് ഷെഡ്ഡിംഗ് അല്ല, സാങ്കേതിക പ്രശ്‌നങ്ങളായ ട്രിപ്പിംഗാണ് കാരണം എന്നായിരുന്നു മന്ത്രിയുടെ വിശദീകരണം. കാലാവസ്ഥാ വ്യതിയാനവും ഇലക്ട്രിക് വാഹനങ്ങളുടെ വര്‍ധനയും വൈദ്യുതി ആവശ്യകത കൂട്ടി പ്രതിസന്ധി രൂക്ഷമാക്കിയതായും അദ്ദേഹം പറഞ്ഞു.

ഉഷ്ണതരംഗത്തിന്റെ തീവ്രത ഇത്തരത്തില്‍ വര്‍ധിക്കുമെന്ന് ആരും മുന്‍കൂട്ടി പ്രവചിച്ചിരുന്നില്ലെന്നും മന്ത്രി ചൂണ്ടിക്കാട്ടി. വൈദ്യുതി ഉല്‍പാദനം കൂട്ടിയില്ലെന്നും മുന്‍കരുതലുകള്‍ എടുത്തില്ലെന്നും പറയുന്നത് ശരിയല്ലെന്നും അദ്ദേഹം പ്രതികരിച്ചു. 

സംസ്ഥാനത്തിന് ആവശ്യമായ വൈദ്യുതിയുടെ ഏകദേശം 70 ശതമാനം പുറത്തുനിന്ന് വാങ്ങേണ്ടിവരുന്ന സാഹചര്യമാണ് നിലവിലുള്ളതെന്നും മന്ത്രി പറഞ്ഞു. പരിസ്ഥിതി ആശങ്കകള്‍ ഉയര്‍ന്നതിനെ തുടര്‍ന്ന് പല ജലവൈദ്യുത പദ്ധതികളും നിര്‍ത്തിവെക്കേണ്ടി വന്നതും നിലവിലെ അവസ്ഥയ്ക്ക് കാരണമായതായും അദ്ദേഹം കൂട്ടിച്ചേര്‍ത്തു.