ഉയര്‍ന്ന പോളിംഗ് ഭരണവിരുദ്ധ തരംഗം: യുഡിഎഫ് 100 സീറ്റുകള്‍ നേടുമെന്ന് കെ. മുരളീധരന്‍

തിരുവനന്തപുരം: സംസ്ഥാനത്തെ ഉയര്‍ന്ന പോളിംഗ് ശതമാനം ഭരണവിരുദ്ധ തരംഗത്തിന്റെ വ്യക്തമായ സൂചനയാണെന്നും യുഡിഎഫ് 100 സീറ്റുകള്‍ വരെ നേടി അധികാരത്തിലെത്തുമെന്നും കെ. മുരളീധരന്‍ അഭിപ്രായപ്പെട്ടു. വട്ടിയൂര്‍ക്കാവില്‍ താന്‍ 5000 മുതല്‍ 10000 വരെ വോട്ടുകളുടെ ഭൂരിപക്ഷത്തില്‍ വിജയിക്കുമെന്ന ആത്മവിശ്വാസവും അദ്ദേഹം പ്രകടിപ്പിച്ചു. വോട്ടര്‍മാര്‍ക്ക് ആവശ്യമായ അടിസ്ഥാന സൗകര്യങ്ങള്‍ ഒരുക്കുന്നതില്‍ തിരഞ്ഞെടുപ്പ് കമ്മീഷന്‍ പരാജയപ്പെട്ടതായും അദ്ദേഹം തിരുവനന്തപുരത്ത് ആരോപിച്ചു.

എല്‍ഡിഎഫ് പ്രചാരണം മുഴുവനും പിണറായി വിജയന്‍നെ കേന്ദ്രീകരിച്ചായിരുന്നു നടത്തിയത്, ഇത് യുഡിഎഫിന് ഗുണകരമായെന്നുമാണ് മുരളീധരന്റെ വിലയിരുത്തല്‍. വോട്ട് ലഭിക്കാത്തതിന് ക്രൈസ്തവ സഭയെയോ മറ്റു സമുദായങ്ങളെയോ കുറ്റപ്പെടുത്തുന്ന പി. സി. ജോര്‍ജിന്റെ നിലപാട് ശരിയല്ലെന്നും അദ്ദേഹം വിമര്‍ശിച്ചു. സമുദായങ്ങളെ പഴിചാരുന്നത് രാഷ്ട്രീയ മര്യാദയല്ലെന്നും അദ്ദേഹം കൂട്ടിച്ചേര്‍ത്തു.

വി. ഡി. സതീശന്‍ മുഖ്യമന്ത്രിയാകുമോയെന്ന ചോദ്യത്തിന്, പാര്‍ട്ടിക്ക് അതിന്റേതായ തീരുമാന പ്രക്രിയയുണ്ടെന്നായിരുന്നു മുരളീധരന്റെ മറുപടി. ഇക്കാര്യത്തില്‍ അതിവേഗ പ്രതികരണങ്ങള്‍ ഒഴിവാക്കണമെന്നും, ജനങ്ങള്‍ ഭരണം ഏല്‍പ്പിക്കുന്ന സാഹചര്യത്തില്‍ അനാവശ്യ വിവാദങ്ങള്‍ സൃഷ്ടിക്കാതിരിക്കാന്‍ നേതാക്കള്‍ ജാഗ്രത പുലര്‍ത്തണമെന്നും അദ്ദേഹം നിര്‍ദേശിച്ചു.