കോണ്‍ഗ്രസിനെ തൃപ്തിപ്പെടുത്താനുള്ള നീക്കളാണ് ജി സുധാകരന്‍ ഇപ്പോള്‍ നടത്തുന്നത്; മുഖ്യമന്ത്രി

ആലപ്പുഴ: ജി സുധാകരന്‍ തന്റെ പഴയ രാഷ്ട്രീയ നിലപാടുകളില്‍ നിന്ന് മാറി പുതിയ വ്യക്തിത്വം തെളിയിക്കാന്‍ ശ്രമിക്കുകയാണെന്ന് മുഖ്യമന്ത്രി പിണറായി വിജയന്‍ ആരോപിച്ചു. ഒരിക്കല്‍ ശക്തമായി എതിര്‍ത്തിരുന്ന കോണ്‍ഗ്രസിനൊപ്പം ചേര്‍ന്നതിലൂടെ അദ്ദേഹത്തിന്റെ നിലപാട് വ്യക്തമാകുന്നതായും മുഖ്യമന്ത്രി പറഞ്ഞു.

കോണ്‍ഗ്രസിനെ തൃപ്തിപ്പെടുത്താനുള്ള നീക്കങ്ങളാണ് സുധാകരന്‍ ഇപ്പോള്‍ നടത്തുന്നതെന്നും, ഇത് അദ്ദേഹത്തെ കൂടുതല്‍ രാഷ്ട്രീയ ജീര്‍ണതയിലേക്ക് നയിക്കുമെന്നും മുഖ്യമന്ത്രി വിമര്‍ശിച്ചു. ആലപ്പുഴയില്‍ പാര്‍ട്ടിക്ക് ശക്തി ഒരാള്‍ക്ക് മാത്രമല്ല, പാര്‍ട്ടിയോടൊപ്പം നില്‍ക്കുന്ന പ്രവര്‍ത്തകരിലൂടെയാണ് ലഭിക്കുന്നതെന്നും അദ്ദേഹം ചൂണ്ടിക്കാട്ടി. പ്രവര്‍ത്തകരെക്കാള്‍ ആവേശം ജനങ്ങളില്‍ തന്നെയുണ്ടെന്നും, അവസരവാദികളുടെ നിലപാട് പാര്‍ട്ടിയെ ബാധിക്കില്ലെന്നും മുഖ്യമന്ത്രി കൂട്ടിച്ചേര്‍ത്തു.

ജി സുധാകരനെ കോണ്‍ഗ്രസ് സ്വീകരിച്ചതില്‍ ഒരു ദയനീയതയുണ്ടെന്നും മുഖ്യമന്ത്രി വിമര്‍ശിച്ചു. കോണ്‍ഗ്രസിലേക്ക് ചേര്‍ന്നത് പെട്ടെന്നുണ്ടായ തീരുമാനം അല്ലെന്നും, മുന്‍കൂട്ടി ചര്‍ച്ചകള്‍ നടന്നിട്ടുണ്ടാകാമെന്നും അദ്ദേഹം ആരോപിച്ചു. സിപിഐഎം വോട്ടുകള്‍ കോണ്‍ഗ്രസിലേക്ക് മാറ്റാമെന്ന വാഗ്ദാനവും സുധാകരന്‍ നല്‍കിയിട്ടുണ്ടാകാമെന്ന് മുഖ്യമന്ത്രി പറഞ്ഞു.

അമ്പലപ്പുഴ മണ്ഡലം ദീര്‍ഘകാലമായി എല്‍ഡിഎഫിന്റെ ശക്തികേന്ദ്രമാണെന്നും, ബിജെപിയുടെ പിന്തുണയോടെ എല്‍ഡിഎഫിനെ തോല്‍പ്പിക്കാമെന്നത് വെറും വ്യാമോഹമെന്നുമാണ് മുഖ്യമന്ത്രിയുടെ വിലയിരുത്തല്‍. ഇത്തവണയും അമ്പലപ്പുഴയില്‍ എല്‍ഡിഎഫ് വിജയിക്കുമെന്ന് ആത്മവിശ്വാസം പ്രകടിപ്പിച്ച അദ്ദേഹം, എച്ച് സലാം വിജയിക്കുമെന്നും വ്യക്തമാക്കി.