എഫ്സിആര്‍എ ഭേദഗതി ബില്‍ പിന്‍വലിക്കണം: കെ സി വേണുഗോപാല്‍

കോട്ടയം: വിവാദമായ എഫ്സിആര്‍എ ഭേദഗതി ബില്ലിനെതിരെ എഐസിസി ജനറല്‍ സെക്രട്ടറിയും ആലപ്പുഴ എംപിയുമായ കെ സി വേണുഗോപാല്‍ രംഗത്ത്. വ്യക്തമായ ഗൂഢലക്ഷ്യങ്ങളോടെയാണ് ബില്‍ പാസാക്കിയതെന്നും, പ്രധാനമന്ത്രി നരേന്ദ്ര മോദി കേരളത്തില്‍ എത്തുമ്പോള്‍ ഇതിന് മറുപടി പറയണമെന്നും അദ്ദേഹം ആവശ്യപ്പെട്ടു.

ഉത്തരേന്ത്യയില്‍ വൈദികരെ ലക്ഷ്യമിട്ട് നടക്കുന്ന ആക്രമണങ്ങള്‍ ഇതിനകം കണ്ടതാണെന്നും, ഇപ്പോള്‍ എഫ്സിആര്‍എ ഭേദഗതി ബില്ലിലൂടെ അതേ പ്രവണത വ്യാപിപ്പിക്കാനാണ് ശ്രമമെന്നും വേണുഗോപാല്‍ ആരോപിച്ചു. നിലവില്‍ മുസ്ലിം വിഭാഗത്തെ ലക്ഷ്യമിടുന്ന നടപടികള്‍ ഭാവിയില്‍ മറ്റ് ന്യൂനപക്ഷങ്ങളിലേക്കും വ്യാപിക്കാമെന്നും, ബില്‍ അടിയന്തരമായി പിന്‍വലിക്കണമെന്നും അദ്ദേഹം പറഞ്ഞു.

സമാധാനത്തോടെ ജീവിക്കുന്ന ജനങ്ങളെ വിഭജിച്ച് അവര്‍ക്കിടയില്‍ വൈരാഗ്യം സൃഷ്ടിക്കാന്‍ പ്രധാനമന്ത്രിയും അദ്ദേഹത്തിന്റെ പാര്‍ട്ടിയും ശ്രമിക്കുകയാണെന്നും അദ്ദേഹം കുറ്റപ്പെടുത്തി. പാര്‍ലമെന്റില്‍ അവതരിപ്പിച്ച ഈ ഭേദഗതി ബില്‍ ന്യൂനപക്ഷ സമൂഹങ്ങള്‍ക്ക് മുകളില്‍ ഡെമോക്ലീസിന്റെ വാളുപോലെ ഭീഷണിയായി നിലകൊള്ളുന്നതായും വേണുഗോപാല്‍ ചൂണ്ടിക്കാട്ടി.

കേരളത്തിലടക്കം, പ്രത്യേകിച്ച് ക്രിസ്ത്യന്‍ സഭകളെ സമ്മര്‍ദ്ദത്തിലാക്കി നിയന്ത്രിക്കാന്‍ ഉള്ള ശ്രമമാണിതെന്നും, സന്നദ്ധ സേവന സംഘടനകളെയും സ്ഥാപനങ്ങളെയും കുരുക്കുന്ന വ്യവസ്ഥകളാണ് ബില്ലില്‍ ഉള്‍പ്പെടുത്തിയിരിക്കുന്നതെന്നും അദ്ദേഹം ആരോപിച്ചു.