പെരുമ്പാവൂരില്‍ സ്വതന്ത്രനായി മത്സരിക്കുമെന്ന് എല്‍ദോസ് കുന്നപ്പിള്ളില്‍

പെരുമ്പാവൂരില്‍ സീറ്റ് ലഭിക്കാത്ത പക്ഷം സ്വതന്ത്ര സ്ഥാനാര്‍ഥിയായി മത്സരിക്കാനൊരുങ്ങുന്നതായി എല്‍ദോസ് കുന്നപ്പിള്ളില്‍. പാര്‍ട്ടി ടിക്കറ്റ് ലഭിക്കാത്ത സാഹചര്യത്തില്‍ ഇന്ന് തന്നെ നാമനിര്‍ദ്ദേശപത്രിക സമര്‍പ്പിക്കാനാണ് തീരുമാനം. പെരുമ്പാവൂരിലെ സ്വന്തം വസതിയില്‍ അടുത്ത അനുയായികളുമായി നടത്തിയ കൂടിക്കാഴ്ചയ്ക്കു ശേഷമാണ് ഈ നിര്‍ണായക തീരുമാനം എടുത്തത്.

ഡല്‍ഹിയില്‍നിന്ന് തിരിച്ച് എത്തിയ ഉടന്‍ തന്നെ എല്‍ദോസ് പ്രാദേശിക നേതാക്കളുമായി ചര്‍ച്ചകള്‍ ആരംഭിച്ചു. അദ്ദേഹത്തിന് പിന്തുണയുമായി നിരവധി കോണ്‍ഗ്രസ് പ്രാദേശിക നേതാക്കള്‍ രംഗത്തെത്തിയിട്ടുണ്ട്. ഏഴ് പഞ്ചായത്ത് പ്രസിഡന്റുമാരും മുനിസിപ്പാലിറ്റി ചെയര്‍പേഴ്സണും ചേര്‍ന്ന് എഐസിസിക്ക് പിന്തുണ കത്ത് അയച്ചതും ശ്രദ്ധേയമാണ്. നിയോജകമണ്ഡലം കമ്മിറ്റിയുടെ മുഴുവന്‍ പിന്തുണയും എല്‍ദോസിനൊപ്പമാണെന്ന് കൂവപ്പടി പഞ്ചായത്ത് പ്രസിഡന്റ് ബിനോയ് അരീക്കല്‍ വ്യക്തമാക്കി.

ഇതിനിടെ, പെരുമ്പാവൂരില്‍ അനുകൂല സാഹചര്യമുണ്ടെന്നാണ് എല്‍ദോസ് പ്രതികരിച്ചത്. ദേശീയ നേതൃത്വത്തില്‍ പൂര്‍ണ വിശ്വാസമുണ്ടെന്നും കെപിസിസി നേതൃത്വം തനിക്ക് അനുകൂലമാണെന്നും അദ്ദേഹം പറഞ്ഞു. തനിക്കെതിരായ കേസ് ഗൂഢാലോചനയാണെന്ന ആരോപണവും എല്‍ദോസ് ആവര്‍ത്തിച്ചു.