വായ്പ എഴുതിത്തള്ളണം; മുണ്ടക്കൈ-ചൂരല്‍മല നിവാസികള്‍ കളക്ടറേറ്റിലേക്ക് മാര്‍ച്ച് നടത്തി

വയനാട്: വായ്പ എഴുതിത്തള്ളാത്തതില്‍ പ്രതിഷേധിച്ച് മുണ്ടക്കൈ-ചൂരല്‍മല പ്രദേശങ്ങളിലെ ദുരന്തബാധിതര്‍ വയനാട് കളക്ടറേറ്റിലേക്ക് മാര്‍ച്ച് നടത്തി. ഭവനപദ്ധതിയില്‍ ഉള്‍പ്പെടാത്ത കുടുംബങ്ങളുടെ വായ്പയും എഴുതിത്തള്ളിയിട്ടില്ലെന്നാരോപിച്ചാണ് സമരം.

മാനദണ്ഡങ്ങളുടെ പേരില്‍ ചിലരെ മാത്രം സഹായ പദ്ധതികളില്‍ നിന്ന് ഒഴിവാക്കിയെന്നാണ് പ്രതിഷേധക്കാരുടെ ആരോപണം. ദുരന്തത്തില്‍ ബാധിതരായ എല്ലാ കുടുംബങ്ങളെയും പുനരധിവാസ പട്ടികയില്‍ ഉള്‍പ്പെടുത്തണമെന്ന് ആവശ്യപ്പെട്ടാണ് സമരക്കാര്‍ രംഗത്തെത്തിയത്.

റേഷന്‍ കാര്‍ഡ് മാനദണ്ഡവും കൂട്ടുകുടുംബ മാനദണ്ഡവും പരിഗണിച്ച് പുനരധിവാസ പട്ടികയില്‍ ഉള്‍പ്പെടുത്തണമെന്ന ആവശ്യവും സമരക്കാര്‍ ഉന്നയിച്ചു.

ദുരന്തത്തില്‍ ബാധിച്ച മൂന്ന് വാര്‍ഡുകളിലുള്‍പ്പെടെ മുഴുവന്‍ ആളുകള്‍ക്കും സഹായം നല്‍കുമെന്ന് സര്‍ക്കാര്‍ ആദ്യം പ്രഖ്യാപിച്ചിരുന്നു. എന്നാല്‍ പിന്നീട് പുനരധിവാസ പട്ടിക തയ്യാറാക്കിയപ്പോള്‍ ദൂരപരിധി അടക്കമുള്ള മാനദണ്ഡങ്ങള്‍ നിശ്ചയിച്ചു. ഈ പരിധിക്കു പുറത്താണെന്ന് ചൂണ്ടിക്കാട്ടി പലരെയും പട്ടികയില്‍ നിന്ന് ഒഴിവാക്കിയതിനെതിരെയാണ് ദുരന്തബാധിതര്‍ പരാതിയുമായി രംഗത്തെത്തിയിരിക്കുന്നത്.