കടബാധ്യത; കണ്ണൂരില്‍ കര്‍ഷകന്‍ ആത്മഹത്യ ചെയ്തു

കണ്ണൂര്‍: കടബാധ്യതയും കാര്‍ഷിക മേഖലയിലെ തിരിച്ചടികളും സഹിക്കാനാകാതെ കണ്ണൂരില്‍ കര്‍ഷകന്‍ ആത്മഹത്യ ചെയ്തു. ചെറുപുഴ സ്വദേശി ഏലിയാസ് അമ്പാട്ട് (62) ആണ് മരിച്ചത്. ഫെബ്രുവരി 11ന് സ്വന്തം കൃഷിയിടത്തില്‍ വെച്ച് കീടനാശിനി കഴിച്ച് ആത്മഹത്യയ്ക്ക് ശ്രമിച്ച അദ്ദേഹം കണ്ണൂരിലെ സ്വകാര്യ ആശുപത്രിയിലെ തീവ്രപരിചരണ വിഭാഗത്തില്‍ ചികിത്സയിലിരിക്കെ ഇന്ന് പുലര്‍ച്ചെയാണ് മരണപ്പെട്ടത്.

കഴിഞ്ഞ 39 വര്‍ഷമായി കൃഷിയെ ജീവിതോപാധിയാക്കിയിരുന്ന ഏലിയാസ് നാട്ടില്‍ അറിയപ്പെടുന്ന കര്‍ഷകനായിരുന്നു. മികച്ച കര്‍ഷകനുള്ള പുരസ്‌കാരങ്ങള്‍ ഉള്‍പ്പെടെ നേടിയിട്ടുള്ള അദ്ദേഹം പത്തേക്കറോളം ഭൂമി പാട്ടത്തിനെടുത്ത് പച്ചക്കറി കൃഷി ചെയ്തുവരികയായിരുന്നു. എന്നാല്‍ വിളനാശവും പച്ചക്കറികളുടെ വിലയിടിവും തുടര്‍ച്ചയായി നേരിട്ടതോടെ സാമ്പത്തിക പ്രതിസന്ധി രൂക്ഷമായി.

വിവിധ സഹകരണ ബാങ്കുകളില്‍ നിന്നും വ്യക്തികളില്‍ നിന്നുമായി ഏകദേശം 30 ലക്ഷം രൂപയുടെ കടബാധ്യത ഉണ്ടായിരുന്നതായി ബന്ധുക്കള്‍ അറിയിച്ചു. കൃഷിയില്‍ നിന്നുള്ള വരുമാനം കൊണ്ട് വായ്പ തിരിച്ചടവ് അസാധ്യമായതോടെ അദ്ദേഹം ആത്മഹത്യയുടെ വഴിയിലേക്ക് നീങ്ങിയതാണെന്ന് കുടുംബം പറയുന്നു. പ്രതിസന്ധി ഘട്ടങ്ങളില്‍ സര്‍ക്കാര്‍ ആവശ്യമായ പിന്തുണ നല്‍കിയില്ലെന്നും കുടുംബം ആരോപിച്ചു.

മൃതദേഹം പോസ്റ്റ്‌മോര്‍ട്ടത്തിനായി പരിയാരം മെഡിക്കല്‍ കോളേജിലേക്ക് മാറ്റി. സംസ്‌കാരം നാളെ നടക്കും.