മുഖ്യതിരഞ്ഞെടുപ്പ് കമ്മിഷണർ മാർച്ച് ആദ്യവാരം കേരളത്തിൽ; തിരഞ്ഞെടുപ്പ് പ്രഖ്യാപനം ഇതിന് ശേഷം

ന്യൂഡൽഹി : നിയമസഭാ തിരഞ്ഞെടുപ്പ് ഒരുക്കങ്ങൾ വിലയിരുത്തുന്നതിനായി മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറും സംഘവും മാർച്ച് ആദ്യവാരം കേരളത്തിലെത്തും. സന്ദർശന വേളയിൽ ചീഫ് സെക്രട്ടറി, ഡിജിപി, ജില്ലാ കളക്ടർമാർ എന്നിവരുമായി കമ്മിഷൻ ചർച്ചകൾ നടത്തും. ഇതിനുപുറമെ, വിവിധ രാഷ്ട്രീയ പാർട്ടി നേതാക്കളുമായി കൂടിക്കാഴ്ച നടത്തി തിരഞ്ഞെടുപ്പ് തീയതി പ്രഖ്യാപനം ഉൾപ്പടെയുള്ള വിഷയങ്ങളിൽ അവരുടെ അഭിപ്രായം തേടും.

കേരളത്തിന് പുറമെ അസം, തമിഴ്‌നാട്, പുതുച്ചേരി എന്നിവിടങ്ങളിലും വരും ദിവസങ്ങളിൽ കമ്മിഷൻ സന്ദർശനം നടത്തുന്നുണ്ട്. ഫെബ്രുവരി 16-ന് അസമിൽ നിന്നുമാണ് സന്ദർശന ഷെഡ്യൂൾ ആരംഭിക്കുന്നത്. കേരളത്തിന് ശേഷമാകും സംഘം ബംഗാളിലെത്തുക. എല്ലാ സംസ്ഥാനങ്ങളിലെയും ഒരുക്കങ്ങൾ വിലയിരുത്തിയ ശേഷം മാർച്ച് പകുതിയോടെ നിയമസഭാ തിരഞ്ഞെടുപ്പ് പ്രഖ്യാപനം ഉണ്ടാകുമെന്നാണ് സൂചന.