സ്വര്‍ണ്ണക്കൊള്ള: തന്ത്രി കണ്ഠരര് രാജീവരെ എസ്‌ഐടി സംഘം കസ്റ്റഡിയില്‍ വാങ്ങും

ശബരിമല സ്വര്‍ണ്ണക്കൊള്ള കേസില്‍ അറസ്റ്റിലായ തന്ത്രി കണ്ഠരര് രാജീവരെ കസ്റ്റഡിയില്‍ വാങ്ങാന്‍ പ്രത്യേക അന്വേഷണ സംഘം (SIT) നീക്കം തുടങ്ങുന്നു. മുഖ്യപ്രതി ഉണ്ണികൃഷ്ണന്‍ പോറ്റിയുമായുള്ള സാമ്പത്തിക ഇടപാടുകളെക്കുറിച്ച് കൂടുതല്‍ വ്യക്തത വരുത്തുന്നതിനും കേസില്‍ നിര്‍ണ്ണായകമായ തെളിവുകള്‍ ശേഖരിക്കുന്നതിനുമാണ് കസ്റ്റഡി അപേക്ഷ നല്‍കുന്നത്. തിങ്കളാഴ്ച കോടതിയില്‍ അപേക്ഷ സമര്‍പ്പിക്കാനാണ് സാധ്യത. തന്ത്രിയെ വിശദമായി ചോദ്യം ചെയ്യേണ്ടത് അന്വേഷണത്തിന്റെ സുഗമമായ മുന്നോട്ടുപോക്കിന് അനിവാര്യമാണെന്ന് എസ് ഐ ടി കോടതിയെ അറിയിച്ചു കഴിഞ്ഞു.

ക്ഷേത്രത്തിലെ ആചാരങ്ങള്‍ ലംഘിച്ച് നടന്ന വലിയൊരു ഗൂഢാലോചനയില്‍ തന്ത്രിക്ക് പങ്കുണ്ടെന്നാണ് അന്വേഷണ സംഘത്തിന്റെ കണ്ടെത്തല്‍. ദേവസ്വം ബോര്‍ഡിന്റെ നിര്‍ദേശപ്രകാരം ഉണ്ണികൃഷ്ണന്‍ പോറ്റിക്ക് സ്വര്‍ണ്ണപ്പാളികള്‍ കൈമാറിയപ്പോള്‍, അത് തടയാന്‍ ശ്രമിക്കാതെ തന്ത്രി മൗനാനുവാദം നല്‍കിയതായി റിപ്പോര്‍ട്ടുകള്‍ ചൂണ്ടിക്കാട്ടുന്നു. ദേവസ്വം മാനുവല്‍ പ്രകാരം ക്ഷേത്ര ചൈതന്യം കാത്തുസൂക്ഷിക്കാന്‍ ഉത്തരവാദിത്തപ്പെട്ട തന്ത്രിയുടെ ഭാഗത്തുനിന്നുണ്ടായ ഈ വീഴ്ച അതീവ ഗുരുതരമാണെന്നാണ് കൊല്ലം വിജിലന്‍സ് കോടതിയില്‍ സമര്‍പ്പിച്ച റിമാന്‍ഡ് റിപ്പോര്‍ട്ടില്‍ പറയുന്നത്.

ശബരിമല സ്വര്‍ണ്ണക്കൊള്ള കേസിലെ മുഖ്യ ആസൂത്രകനായ ഉണ്ണികൃഷ്ണന്‍ പോറ്റിയുമായി തന്ത്രിക്ക് അടുത്ത ബന്ധമുണ്ടെന്ന് വ്യക്തമായതോടെയാണ് അന്വേഷണം അദ്ദേഹത്തിലേക്ക് നീണ്ടത്. കഴിഞ്ഞ ദിവസം തിരുവനന്തപുരത്ത് വെച്ച് രാവിലെ പത്ത് മണി മുതല്‍ ഉന്നത ഉദ്യോഗസ്ഥര്‍ നടത്തിയ നീണ്ട ചോദ്യം ചെയ്യലിന് ശേഷമാണ് ഉച്ചതിരിഞ്ഞ് അറസ്റ്റ് രേഖപ്പെടുത്തിയത്. നിലവില്‍ റിമാന്‍ഡിലുള്ള തന്ത്രിയെ കസ്റ്റഡിയില്‍ ലഭിക്കുന്നതോടെ കൂടുതല്‍ വിവരങ്ങള്‍ പുറത്തുവരുമെന്നാണ് കരുതപ്പെടുന്നത്.

എന്നാല്‍, ഈ ആരോപണങ്ങളെല്ലാം തന്ത്രി നിഷേധിച്ചിട്ടുണ്ട്. താന്‍ തികച്ചും നിരപരാധിയാണെന്നും ആസൂത്രിതമായി തന്നെ കേസില്‍ കുടുക്കിയതാണെന്നുമാണ് കണ്ഠരര് രാജീവരുടെ പ്രതികരണം. അറസ്റ്റ് രാഷ്ട്രീയ പ്രേരിതമാണോ എന്നതടക്കമുള്ള ചര്‍ച്ചകള്‍ ഇതോടെ സജീവമായിട്ടുണ്ട്. കേസില്‍ മറ്റാരൊക്കെ ഉള്‍പ്പെട്ടിട്ടുണ്ടെന്നത് സംബന്ധിച്ചും വരും ദിവസങ്ങളില്‍ കൂടുതല്‍ വെളിപ്പെടുത്തലുകള്‍ ഉണ്ടായേക്കാം.