പ്രമുഖ പരിസ്ഥിതി ശാസ്ത്രജ്ഞന്‍ മാധവ് ഗാഡ്ഗില്‍ അന്തരിച്ചു

പ്രമുഖ പരിസ്ഥിതി ശാസ്ത്രജ്ഞന്‍ മാധവ് ഗാഡ്ഗില്‍ അന്തരിച്ചു. വാര്‍ധക്യസഹജമായ രോഗങ്ങളെത്തുടര്‍ന്ന് പൂനെയില്‍ വെച്ചായിരുന്നു അന്ത്യം.83 വയസായിരുന്നു. സംസ്‌കാരം വൈകിട്ട് നാലുമണിക്ക് പൂനെയില്‍ നടക്കും.പശ്ചിമഘട്ട സംരക്ഷണത്തിനായി പോരാടിയ ഗാഡ്ഗിലിനെ രാജ്യം പത്മഭൂഷണ്‍ നല്‍കി ആദരിച്ചിരുന്നു.

പശ്ചിമഘട്ടത്തിന്റെ സംരക്ഷണത്തിനായി അദ്ദേഹം സമര്‍പ്പിച്ച ഗാഡ്ഗില്‍ റിപ്പോര്‍ട്ട് ഇന്ത്യയിലെ പരിസ്ഥിതി ചര്‍ച്ചകളില്‍ വലിയ വിപ്ലവമാണ് സൃഷ്ടിച്ചത്. പശ്ചിമഘട്ട മേഖലയെ മൂന്ന് പരിസ്ഥിതി ലോല മേഖലകളായി തിരിക്കണമെന്നും പരിസ്ഥിതിക്ക് ആഘാതമുണ്ടാക്കുന്ന ഖനനം, നിര്‍മ്മാണം തുടങ്ങിയ പ്രവര്‍ത്തനങ്ങള്‍ക്ക് നിയന്ത്രണം ഏര്‍പ്പെടുത്തണമെന്നും അദ്ദേഹം ശക്തമായി വാദിച്ചു. കേരളമടക്കമുള്ള സംസ്ഥാനങ്ങളില്‍ ഈ റിപ്പോര്‍ട്ട് വലിയ രാഷ്ട്രീയ-സാമൂഹിക വിവാദങ്ങള്‍ക്ക് വഴിവെച്ചെങ്കിലും, പില്‍ക്കാലത്തുണ്ടായ പ്രകൃതിക്ഷോഭങ്ങളുടെ പശ്ചാത്തലത്തില്‍ അദ്ദേഹത്തിന്റെ മുന്നറിയിപ്പുകള്‍ വീണ്ടും ചര്‍ച്ച ചെയ്യപ്പെട്ടിരുന്നു.

ബെംഗളൂരുവിലെ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സയന്‍സിലെ സെന്റര്‍ ഫോര്‍ ഇക്കോളജിക്കല്‍ സയന്‍സസിന്റെ സ്ഥാപകനായ അദ്ദേഹം, രാജ്യത്തെ ജൈവവൈവിധ്യ നിയമങ്ങള്‍ രൂപീകരിക്കുന്നതിലും നിര്‍ണ്ണായക പങ്ക് വഹിച്ചു. രാജ്യം പത്മശ്രീ (1981), പത്മഭൂഷണ്‍ (2006) എന്നീ ബഹുമതികള്‍ നല്‍കി അദ്ദേഹത്തെ ആദരിച്ചിട്ടുണ്ട്. അന്താരാഷ്ട്ര തലത്തില്‍ പരിസ്ഥിതി മേഖലയിലെ നോബല്‍ എന്ന് വിശേഷിപ്പിക്കപ്പെടുന്ന ടൈലര്‍ പ്രൈസ്, വോള്‍വോ എന്‍വയോണ്‍മെന്റ് പ്രൈസ് എന്നിവയും അദ്ദേഹം നേടിയിട്ടുണ്ട്.

ഏറ്റവും ഒടുവില്‍ 2024-ല്‍ ഐക്യരാഷ്ട്രസഭയുടെ ഏറ്റവും ഉയര്‍ന്ന പരിസ്ഥിതി പുരസ്‌കാരമായ ചാമ്പ്യന്‍സ് ഓഫ് ദി എര്‍ത്ത്(ജീവപര്യന്തം നേട്ടം) പുരസ്‌കാരവും അദ്ദേഹത്തെ തേടിയെത്തി. പശ്ചിമഘട്ടത്തെ സ്‌നേഹിക്കുകയും അതിന്റെ നാശത്തെക്കുറിച്ച് നിരന്തരം മുന്നറിയിപ്പ് നല്‍കുകയും ചെയ്ത  ജനകീയ ശാസ്ത്രജ്ഞന്‍ എന്ന നിലയിലാകും മാധവ് ഗാഡ്ഗില്‍ എക്കാലവും സ്മരിക്കപ്പെടുക