നിയമസഭാ തിരഞ്ഞെടുപ്പ്: പിജെ ജോസഫ് തൊടുപുഴയില്‍ തന്നെ മത്സരിക്കും

നിയമസഭാ തിരഞ്ഞെടുപ്പില്‍ കേരള കോണ്‍ഗ്രസ് (ജോസഫ്) ചെയര്‍മാന്‍ പിജെ ജോസഫ് തൊടുപുഴ നിയമസഭാ മണ്ഡലത്തില്‍ തന്നെ മത്സരിക്കുമെന്ന് പാര്‍ട്ടി നേതൃത്വം വ്യക്തമാക്കി. വിജയസാധ്യത കണക്കിലെടുത്താണ് ഈ തീരുമാനമെന്നും മുതിര്‍ന്ന നേതാക്കള്‍ എല്ലാം തെരഞ്ഞെടുപ്പ് രംഗത്ത് സജീവമാകുമെന്നും സംസ്ഥാന കോ-ഓര്‍ഡിനേറ്റര്‍ അപു ജോണ്‍ ജോസഫ്  പറഞ്ഞു.

ആരോഗ്യകാരണങ്ങളാല്‍ പിജെ ജോസഫ് തെരഞ്ഞെടുപ്പില്‍ നിന്ന് പിന്മാറുമെന്ന തരത്തില്‍ പ്രചാരണം നടന്നിരുന്നെങ്കിലും അതില്‍ യാതൊരു വാസ്തവവുമില്ലെന്ന് അപു ജോണ്‍ ജോസഫ് വ്യക്തമാക്കി. നിലവില്‍ കേരള കോണ്‍ഗ്രസ് (ജോസഫ്) വിഭാഗത്തിന് 10 നിയമസഭാ സീറ്റുകളുണ്ടെന്നും, ഈ സീറ്റുകളിലെല്ലാം പാര്‍ട്ടി തന്നെ സ്ഥാനാര്‍ഥികളെ നിര്‍ത്തുമെന്നും അദ്ദേഹം പറഞ്ഞു. കേരള കോണ്‍ഗ്രസിന്റെ സീറ്റുകള്‍ കോണ്‍ഗ്രസ് ഏറ്റെടുക്കുമെന്ന പ്രചാരണം ചിലര്‍ വ്യക്തിപരമായ താത്പര്യങ്ങള്‍ മുന്‍നിര്‍ത്തി നടത്തുന്നതാണെന്നും അദ്ദേഹം ആരോപിച്ചു.

തൊടുപുഴ മണ്ഡലത്തില്‍ ഇത്രയും വികസന പ്രവര്‍ത്തനങ്ങള്‍ നടത്തിയ മറ്റൊരു നേതാവില്ലെന്നും അതുകൊണ്ട് തന്നെ പാര്‍ട്ടി ചെയര്‍മാനായ പിജെ ജോസഫിനെ തന്നെ വീണ്ടും സ്ഥാനാര്‍ഥിയാക്കണമെന്നതാണ് പാര്‍ട്ടിയിലെ പൊതുവായ അഭിപ്രായമെന്നും അപു ജോസഫ് പറഞ്ഞു.