ചാക്കില്‍ കെട്ടിയ നിലയില്‍ യുവതിയുടെ മൃതദേഹം: കൊലപാതകമെന്ന് പൊലീസ് സ്ഥിരീകരണം; പ്രതി ജോര്‍ജ്

കൊച്ചി: തേവര കോന്തുരുത്തിയില്‍ ചാക്കില്‍ കെട്ടിയ നിലയില്‍ യുവതിയുടെ മൃതദേഹം കണ്ടെത്തിയ സംഭവത്തിന്റെ കൂടുതല്‍ വിവരങ്ങള്‍ പുറത്തുവന്നു. പ്രതിയായ ജോര്‍ജ് വിശദമായ ചോദ്യം ചെയ്യലില്‍ കൊലപാതകം നടത്തിയതായി പൊലീസ് മുമ്പാകെ സമ്മതിച്ചു. കൊല്ലപ്പെട്ടത് ലൈംഗിക തൊഴിലാളിയാണെന്ന് ജോര്‍ജ് മൊഴിയില്‍ വ്യക്തമാക്കി.

ഇന്നലെ രാത്രി എറണാകുളം സൗത്ത് റെയില്‍വേ സ്റ്റേഷനില്‍ നിന്ന് യുവതിയെ വീട്ടിലേക്ക് കൂട്ടിക്കൊണ്ടുവന്നതാണെന്ന് ജോര്‍ജ് പറഞ്ഞു. വീട്ടിലെത്തിയ ശേഷം ഇരുവരും തമ്മില്‍ സാമ്പത്തിക തര്‍ക്കം ഉണ്ടായി. ഈ തര്‍ക്കത്തിനിടെ ചുറ്റിക ഉപയോഗിച്ച് തലയില്‍ അടിച്ചാണ് കൊലപ്പെടുത്തിയതെന്നും അദ്ദേഹം മൊഴി നല്‍കി.

ഇന്ന് രാവിലെ ജോര്‍ജിന്റെ വീട്ടിലേക്കുള്ള വഴിയരികില്‍ ചാക്കില്‍ കെട്ടിയ നിലയില്‍ മൃതദേഹം കണ്ടത് ശുചീകരണ തൊഴിലാളികളാണ് ആദ്യം ശ്രദ്ധയില്‍പ്പെടുത്തിയത്. മൃതദേഹത്തിനടുത്ത് ഇരുന്ന നിലയില്‍ ജോര്‍ജിനെ കണ്ടതോടെ പൊലീസിനെ വിവരം അറിയിച്ചു. തുടര്‍ന്ന് പൊലീസ് സ്ഥലത്തെത്തി പരിശോധനയും ചോദ്യംചെയ്യലും നടത്തി.

വീടിനുള്ളില്‍ രക്തക്കറ കണ്ടെത്തിയതായി പൊലീസ് പറഞ്ഞു. കൊല ചെയ്ത ശേഷം മൃതദേഹം ഉപേക്ഷിക്കാനിറങ്ങിയതായും, ഈ സമയം വഴിയരികില്‍ ജോര്‍ജ് തളര്‍ന്നു വീണതായും അന്വേഷണത്തില്‍ തെളിഞ്ഞു.