ഡല്‍ഹി സ്ഫോടനത്തിന്റെ പിന്നില്‍ തുര്‍ക്കി ഹാന്‍ഡ്‌ലര്‍ ഉകാസ; ഉമര്‍ നബി നേരിട്ട് പങ്കാളിയായി

ഡല്‍ഹി സ്ഫോടനക്കേസില്‍ പ്രധാന പ്രതിയായ ഡോ. ഉമര്‍ നബി പ്രവര്‍ത്തിച്ചിരുന്നത് ഉകാസ എന്ന ഹാന്‍ഡിലിന്റെ നിര്‍ദ്ദേശം അനുസരിച്ചാണെന്ന് അന്വേഷണസംഘത്തിന്റെ കണ്ടെത്തല്‍. ഉകാസ എന്ന രഹസ്യനാമത്തില്‍ അറിയപ്പെട്ടിരുന്ന തുര്‍ക്കി കേന്ദ്രീകരിച്ചു പ്രവര്‍ത്തിക്കുന്നതാണ് ഈ ഹാന്‍ഡ്‌ലര്‍. അറബിയില്‍ ചിലന്തി എന്നര്‍ത്ഥം വരുന്ന ഉകാസ തുര്‍ക്കിയിലെ അങ്കാറയില്‍ നിന്നാണ് പ്രവര്‍ത്തിച്ചിരുന്നതെന്ന് ഉറവിടങ്ങള്‍ വ്യക്തമാക്കുന്നു.

വൈറ്റ് കോളര്‍ ഭീകരസംഘത്തെ ജയ്ഷ്-എ-മുഹമ്മദ് സംഘവുമായി ബന്ധിപ്പിച്ചത് ഉകാസ തന്നെയാണെന്നും റിപ്പോര്‍ട്ടുകള്‍ സൂചിപ്പിക്കുന്നു. ഡോ. ഉമര്‍ നബി ഈ ഹാന്‍ഡ്‌ലറുമായി നിരന്തരം ആശയവിനിമയം നടത്തിയിരുന്നതായും, ഇയാളെ നേരില്‍ കാണാനായി തുര്‍ക്കിയിലേക്ക് യാത്ര ചെയ്തതായും അന്വേഷണത്തില്‍ തെളിഞ്ഞിട്ടുണ്ട്.

ഡല്‍ഹി സ്ഫോടനവുമായി ബന്ധപ്പെട്ട നിര്‍ണ്ണായക വിവരങ്ങള്‍ ഉമര്‍ ഉകാസയുമായി പങ്കുവെച്ചിരുന്നതായും അന്വേഷണ ഏജന്‍സികള്‍ കണ്ടെത്തി. ഡിസംബര്‍ 6ന് ഡല്‍ഹിയിലെ ആറിടങ്ങളില്‍ ഒരേസമയം സ്ഫോടനം നടത്താന്‍ സംഘം പദ്ധതിയിട്ടിരുന്നതായി റിപ്പോര്‍ട്ടുകള്‍ പറയുന്നു. കൊണാട്ട് പ്ലേസ്, മയൂര്‍ വിഹാര്‍, റെഡ് ഫോര്‍ട്ട് പാര്‍ക്കിംഗ് തുടങ്ങിയ പ്രദേശങ്ങള്‍ ആക്രമണലക്ഷ്യങ്ങളില്‍ ഉള്‍പ്പെട്ടിരുന്നതായി സൂചന ലഭിച്ചു.