അരൂര്‍-തുറവൂര്‍ ഉയരപ്പാതയിലെ ഗര്‍ഡര്‍ അപകടം; മന്ത്രി പി.എ മുഹമ്മദ് റിയാസ് റിപ്പോര്‍ട്ട് തേടി

അരൂര്‍ - തുറവൂര്‍ ഉയരപ്പാത നിര്‍മാണത്തിനിടെ ഗര്‍ഡര്‍ വീണ് പിക്കപ് വാന്‍ ഡ്രൈവര്‍ മരിച്ച സംഭവത്തില്‍ പൊതുമരാമത്ത് മന്ത്രി പി എ മുഹമ്മദ് റിയാസ് റിപ്പോര്‍ട്ട് തേടി. പൊതുമരാമത്ത് വകുപ്പ് സെക്രട്ടറിയോട് ആണ് റിപ്പോര്‍ട്ട് തേടിയത്. സുരക്ഷാ വീഴ്ചയുണ്ടായെങ്കില്‍ കര്‍ശന നടപടിയുണ്ടാകുമെന്ന് അരൂര്‍ എംഎല്‍എ ദലീമയും പറഞ്ഞു.

ചന്തിരൂരില്‍ ഞായറാഴ്ച വൈകുന്നേരം അപകടമുണ്ടായത്. നിര്‍മാണത്തിലിരുന്ന രണ്ട് ഗര്‍ഡറുകളാണ് താഴേക്ക് പതിച്ചത്. ഈ സമയം അതുവഴി മുട്ട കയറ്റി വന്ന പിക്കപ്പ് വാനിന് മുകളിലേക്കാണ് ഗര്‍ഡറുകള്‍ വീണത്.  ആലപ്പുഴ പള്ളിപ്പാട് സ്വദേശി രാജേഷാണ് അപകടത്തില്‍ മരിച്ചത്. ഉടന്‍ തന്നെ ക്രെയിന്‍ എത്തിച്ച് ഗര്‍ഡറുകള്‍ ഉയര്‍ത്തി മാറ്റിയ ശേഷമാണ് രാജേഷിന്റെ മൃതദേഹം പുറത്തെടുക്കാന്‍ സാധിച്ചത്.

ജാക്കി തെന്നി മാറിയതാണ് അപകടത്തിന് കാരണമായതെന്നാണ് പ്രാഥമിക നിഗമനം. അപകടത്തെ തുടര്‍ന്ന് ആലപ്പുഴ - എറണാകുളം റൂട്ടില്‍ ഗതാഗതം വഴിതിരിച്ചുവിട്ടിട്ടുണ്ട്. എറണാകുളം ഭാഗത്തേക്ക് പോകുന്ന വാഹനങ്ങള്‍ ചേര്‍ത്തല എക്‌സറേ ജംഗ്ഷനില്‍ നിന്ന് പൂച്ചാക്കല്‍ വഴിയാണ് തിരിച്ചുവിടുന്നത്.