വൈറ്റ് കോളര്‍ ഭീകര ശൃംഖല: ഹരിയാന പള്ളി ഇമാം മൗലവി ഇഷ്തിയാഖ് അറസ്റ്റില്‍

ഹരിയാനയില്‍ മതപ്രഭാഷകനെ ജമ്മു കശ്മീര്‍ പൊലീസ് അറസ്റ്റ് ചെയ്തു. മേവാത്ത് മേഖലയില്‍ നിന്നുള്ള മൗലവി ഇഷ്തിയാഖ് എന്നയാളെയാണ് പിടികൂടിയത്. ചോദ്യം ചെയ്യലിനായി ശ്രീനഗറിലേക്ക് കൊണ്ട് പോയി. ഫരീദാബാദിലെ ഭീകര ശൃംഖലയുമായി അടുത്ത ബന്ധം ഉണ്ടായിരുന്നതായി കണ്ടെത്തല്‍.

ഫരീദാബാദിലെ ഭീകര ശൃംഖലയുമായി ഇഷ്തിയാഖിന് അടുത്ത ബന്ധമുണ്ടായിരുന്നതായി പ്രാഥമിക അന്വേഷണത്തില്‍ കണ്ടെത്തിയിട്ടുണ്ട്. അല്‍-ഫലാഹ് സര്‍വകലാശാലാ പരിസരത്ത് വാടകയ്ക്ക് താമസിച്ചിരുന്ന ഒരു വീട്ടില്‍ നിന്നാണ് പുരോഹിതനെ പിടികൂടിയതെന്ന് ഉദ്യോഗസ്ഥര്‍ അറിയിച്ചു.

നിരോധിത സംഘടനകളായ ജെയ്ഷെ മുഹമ്മദ് (ജെ.ഇ.എം), അന്‍സാര്‍ ഗസ്വത്-ഉല്‍-ഹിന്ദ് എന്നിവയുടെ വൈറ്റ് കോളര്‍ ഭീകര ശൃംഖലയെ കണ്ടെത്തുന്നതിനുള്ള വിപുലമായ ഓപ്പറേഷന്റെ ഭാഗമായാണ് ഈ അറസ്റ്റ്. നവംബര്‍ 10 ന് ഹരിയാനയിലും ഉത്തര്‍പ്രദേശിലും പൊലീസ് നടത്തിയ അന്തര്‍സംസ്ഥാന റെയ്ഡുകളുടെ തുടര്‍ച്ചയാണിത്.

അടുത്തിടെ നടന്ന പ്രധാന ഭീകരവിരുദ്ധ ഓപ്പറേഷനില്‍ 2,500 കിലോഗ്രാം അമോണിയം നൈട്രേറ്റ്, പൊട്ടാസ്യം ക്ലോറേറ്റ്, സള്‍ഫര്‍ തുടങ്ങിയ സ്‌ഫോടക വസ്തുക്കള്‍ കണ്ടെത്തിയിരുന്നു. ഈ ഫരീദാബാദ് മൊഡ്യൂളുമായി ഇഷ്തിയാഖിന് ബന്ധമുണ്ടെന്നാണ് പൊലീസ് സംശയിക്കുന്നത്.

പ്രാഥമിക ചോദ്യം ചെയ്യലിനുശേഷം ഇദ്ദേഹത്തിന്റെ ഔദ്യോഗിക അറസ്റ്റ് രേഖപ്പെടുത്താന്‍ സാധ്യതയുണ്ടെന്ന് അന്വേഷണ വൃത്തങ്ങള്‍ സൂചിപ്പിച്ചു. ഫരീദാബാദ് കേന്ദ്രീകരിച്ചുള്ള ഭീകര ശൃംഖലയുടെ പിന്നിലെ കണ്ണികളെ കണ്ടെത്താനുള്ള ശ്രമങ്ങള്‍ പൊലീസ് തുടരുകയാണ്.