അടുത്ത വര്‍ഷം 6.8 ശതമാനം വരെ ഇന്ത്യയുടെ വളര്‍ച്ച, കാര്‍ഷിക മേഖലയുടെ വളര്‍ച്ച 3.8 ശതമാനം; സാമ്പത്തിക സര്‍വേ പാര്‍ലമെന്റില്‍

2025-26 കേന്ദ്ര ബജറ്റിന് മുന്നോടിയായുള്ള സാമ്പത്തിക സര്‍വെ ധനമന്ത്രി നിര്‍മ്മലാ സീതാരമാന്‍ സഭയ്ക്കു മുന്നില്‍ വച്ചു. നടപ്പുസാമ്പത്തിക വര്‍ഷത്തില്‍ 6.3 ശതമാനം മുതല്‍ 6.8 ശതമാനം വരെ ജി.ഡി.പി വളര്‍ച്ചയെന്നാണ് സാമ്പത്തിക സര്‍വേ റിപ്പോര്‍ട്ടില്‍ പറഞ്ഞിരിക്കുന്നത്. രാജ്യത്തെ കാര്‍ഷിക മേഖലയുടെ വളര്‍ച്ച 3.8 ശതമാനമായെന്നും റിപ്പോര്‍ട്ട് വ്യക്തമാക്കുന്നു. വ്യവസായ മേഖല 6.2 ശതമാനം വളരുമെന്ന് പ്രവചനം. സേവനമേഖല 7.2 ശതമാനം വളരുമെന്ന് പ്രവചനം.

ശക്തമായ സാമ്പത്തിക സ്ഥിതി, സാമ്പത്തിക ഏകീകരണം, സ്ഥിരതയുള്ള സ്വകാര്യ ഉപഭോഗം എന്നിവയിലൂടെ സമ്പദ്‌വ്യവസ്ഥ കരുത്ത് ആര്‍ജ്ജിക്കുന്നുണ്ട്. ഉയര്‍ന്ന പൊതു മൂലധന നിക്ഷേപവും മെച്ചപ്പെട്ട വ്യവസായങ്ങളിലും നിക്ഷേപ പ്രവര്‍ത്തനങ്ങളിലും പ്രതീക്ഷ നല്‍കുന്നതായും സാമ്പത്തിക സര്‍വേയില്‍ വ്യക്തമാക്കിയിട്ടുണ്ട്. 

രാജ്യത്തെ ബാങ്കുകളുടെ കിട്ടാക്കടം 2.6 ശതമാനമായി താഴ്ന്നു. 12 വര്‍ഷത്തെ ഏറ്റവും താഴ്ന്ന നിലയിലാണിത്. രാജ്യത്ത് നേരിട്ടുള്ള വിദേശ നിക്ഷേപം ഏപ്രില്‍-നവംബര്‍ കാലയളവില്‍ 17.9 ശതമാനം വര്‍ധിച്ചതായി സാമ്പത്തിക സര്‍വേ റിപ്പോര്‍ട്ട് സൂചിപ്പിക്കുന്നു.

ഇന്ത്യന്‍ സമ്പദ്‌വ്യവസ്ഥയുടെ കഴിഞ്ഞ ഒരുവര്‍ഷക്കാലത്തെ പ്രകടനത്തിന്റെ അവലോകനവും കേന്ദ്രസര്‍ക്കാരിന്റെ ഇനിയുള്ള നയങ്ങളിലേക്കുള്ള ദിശാസൂചികയുമാണ് സാമ്പത്തിക സര്‍വേ. 2022-23ല്‍ 7 ശതമാനവും 2023-24ല്‍ 8.2 ശതമാനവുമായിരുന്നു വളര്‍ച്ച. 2021-22ല്‍ 9.7 ശതമാനവും വളര്‍ന്നിരുന്നു.