യുഡിഎഫ് ട്രാന്‍സ്വുമണ്‍ അരുണിമ എം. കുറുപ്പിന് മത്സരിക്കാം; നാമനിര്‍ദേശ പത്രിക സ്വീകരിച്ചു

ആലപ്പുഴ: വരാനിരിക്കുന്ന തദ്ദേശ തിരഞ്ഞെടുപ്പില്‍ ആലപ്പുഴ ജില്ലാ പഞ്ചായത്ത് വയലാര്‍ ഡിവിഷനിലെ യുഡിഎഫ് സ്ഥാനാര്‍ത്ഥിയായി മത്സരിക്കുന്ന ട്രാന്‍സ്വുമണ്‍ അരുണിമ എം. കുറുപ്പിന്റെ നാമനിര്‍ദേശ പത്രിക സൂക്ഷ്മപരിശോധനയില്‍ അംഗീകരിച്ചു. ഇതോടെ, സ്ഥാനാര്‍ത്ഥിത്വവുമായി ബന്ധപ്പെട്ടുണ്ടായിരുന്ന എല്ലാ ആശങ്കകള്‍ക്കും അനിശ്ചിതത്വങ്ങള്‍ക്കും വിരാമമായി.

വനിതാ സംവരണ സീറ്റായ വയലാര്‍ ഡിവിഷനില്‍ ട്രാന്‍സ്വുമണിന്റെ സ്ഥാനാര്‍ത്ഥിത്വം കഴിഞ്ഞ ദിവസങ്ങളില്‍ വലിയ ചര്‍ച്ചയായിരുന്നു. എന്നാല്‍, സൂക്ഷ്മപരിശോധനയില്‍ നാമനിര്‍ദേശ പത്രിക സ്വീകരിച്ചതോടെ അരുണിമയ്ക്ക് നിയമപരമായി മത്സരരംഗത്ത് തുടരാം. അരുണിമയുടെ വോട്ടര്‍ ഐഡി ഉള്‍പ്പെടെയുള്ള ഔദ്യോഗിക രേഖകളില്‍ സ്ത്രീ എന്നാണ് രേഖപ്പെടുത്തിയിരിക്കുന്നത്. അതിനാല്‍, വനിതാ സംവരണ സീറ്റില്‍ മത്സരിക്കുന്നതിന് നിയമപരമായി യാതൊരു തടസ്സവുമില്ലെന്ന് വരണാധികാരികള്‍ സ്ഥിരീകരിച്ചു.

പത്രികയുടെ സൂക്ഷ്മപരിശോധനാ വേളയില്‍ എതിര്‍സ്ഥാനാര്‍ത്ഥികളോ മറ്റ് വ്യക്തികളോ നാമനിര്‍ദേശ പത്രികയെ ചോദ്യം ചെയ്ത് രംഗത്തെത്തിയിരുന്നില്ല. തന്റെ രേഖകളെല്ലാം സ്ത്രീ എന്ന വിഭാഗത്തില്‍ ആയതിനാല്‍ മത്സരത്തിന് നിയമതടസ്സമില്ലെന്നും പാര്‍ട്ടിയുടെ (യുഡിഎഫ്) പൂര്‍ണ പിന്തുണ തനിക്കുണ്ടെന്നും അരുണിമ നേരത്തെ പ്രതികരിച്ചിരുന്നു. കേരളത്തിലെ തദ്ദേശ തിരഞ്ഞെടുപ്പ് ചരിത്രത്തില്‍ ഒരു പ്രധാന രാഷ്ട്രീയ മുന്നണിയുടെ ടിക്കറ്റില്‍ ഒരു ട്രാന്‍സ്വുമണ്‍ മത്സരിക്കുന്നു എന്ന പ്രത്യേകതയും ഈ സ്ഥാനാര്‍ത്ഥിത്വത്തിനുണ്ട്.