അവഗണിക്കുന്നതിനും ഒരു പരിധിയില്ലേ ഫ്‌ളിക്കെ; വേണ്ടെങ്കില്‍ മാന്യമായി പറഞ്ഞയയക്കൂ... കൊത്തിക്കോണ്ടുപോകാന്‍ പുറത്ത് ആളുകളുണ്ട്

ചാമ്പ്യന്മാരുടെ പാളയത്തില്‍ നിന്നും അവരുടെ കപ്പിത്താനെ തന്നെ ഫ്രീ ട്രാന്‍സ്ഫറില്‍ ആനയിച്ചു കൊണ്ടുവരിക. എന്നിട്ട് 12 മാസം തികയും മുന്‍പ് പോര് കാണിക്കുക. ഇതല്ലേ അക്ഷരാര്‍ത്ഥത്തില്‍ മുന്‍ മാഞ്ചസ്റ്റര്‍ സിറ്റി താരം ഇല്‍കേ ഗുണ്ടോഗനോട് ബാഴ്‌സലോണ മാനേജ്‌മെന്റും ഹെഡ് കോച്ച് ഹന്‍സി ഫ്‌ലിക്കും കാണിച്ചുകൊണ്ടിരിക്കുന്നത്.

ബാഴ്‌സലോണയ്ക്കുവേണ്ടി ഒരു വര്‍ഷത്തിനിടെ അഞ്ച് ഗോളുകളും 14 അസിസ്റ്റുകളും സ്വന്തം പേരില്‍ കുറിക്കുക എന്നത് അത്ര ഈസിയായ കാര്യമല്ല. അതും ഒരു മിഡ്ഫീല്‍ഡര്‍. ഓണ്‍ ബോളിലും ഓഫ് ബോളിലും പൊസിഷനുകള്‍ ചെയ്ഞ്ച് ചെയ്ത് ഇത്ര അഗ്രസീവായി കളിക്കാന്‍ സാധിക്കുന്ന ഗുണ്ടോഗനെ പോലൊരു പ്ലയറെ കിട്ടിയാല്‍ കോച്ചുമാര്‍ താലത്തില്‍ കൊണ്ടുനടക്കും. പക്ഷെ ബാഴ്‌സലോണയാകട്ടെ തീറ്റിപ്പോറ്റാന്‍ കഴിയുന്നില്ലെന്ന മുടന്തന്‍ ന്യായം പറഞ്ഞ് ഇല്‍കേ ഗുണ്ടോഗന്‍ എന്ന ജര്‍മന്‍ ഇതിഹാസ താരത്തെ വില്‍ക്കാനൊരുങ്ങുകയാണ്.

ഗുണ്ടോഗന് നല്‍കുന്ന സാലറിയാണ് ബാഴ്‌സലോണയ്ക്ക് ഇപ്പോള്‍ പ്രശ്‌നം. ഇതേ സാലറി സമ്മതിച്ചാണ് 12 മാസം മുന്‍പ് മാഞ്ചസ്റ്റര്‍ സിറ്റിയില്‍ നിന്ന് ഈ 33 കാരനെ കൊണ്ടുവന്നതെന്ന് ബാഴ്‌സലോണ മാനേജ്‌മെന്റ് പക്ഷെ ഓര്‍ക്കുന്നില്ല. എന്നുവച്ചാല്‍ പ്രശ്‌നം അതല്ല. അറ്റാക്കിംഗ് മിഡ്ഫീല്‍ഡറായ സ്പാനിഷ് താരം ഡാനി ഓല്‍മോയെ ബാഴ്‌സലോണയിലേക്ക് കൊണ്ടുവരണം. അതിനാണ് ഗുണ്ടോഗനെ ചവിട്ടി പുറത്താക്കാന്‍ നോക്കുന്നത്.

ഒല്‍മോ ബാഴ്‌സലോണയുമായി കരാര്‍ ഒപ്പുവച്ചിട്ടുണ്ടെങ്കിലും ടീമിന്റെ ഭാഗമായിട്ടില്ല. സാമ്പത്തികം തന്നെയാണ് പ്രശ്‌നം. കഴിഞ്ഞ സീസണ്‍ ബാഴ്‌സലോണക്ക് ഒട്ടും ശുഭകരമായിരുന്നില്ല. അതിന്റേതായ സാമ്പത്തിക പ്രശ്‌നങ്ങളൊക്കെ ടീം നേരിടുന്നുണ്ട്. വലിയ തുക ചിലവഴിച്ച് രണ്ട് മിഡ്ഫീല്‍ഡര്‍മാരെ നിലനിര്‍ത്തേണ്ടതില്ല എന്നതാകും മാനേജ്‌മെന്റിന്റെ മനസില്‍. മാത്രമല്ല യുവതാരത്തെ എത്തിക്കാനായാല്‍ കരിയറിന്റെ അവസാനത്തില്‍ നില്‍ക്കുന്ന ഗുണ്ടോഗനെ പിന്നെയെന്തിനാണെന്നും ബാഴ്‌സ മാനേജ്‌മെന്റ് ആലോചിക്കുന്നുണ്ടാകും.

അത് ഗുണ്ടോഗന്റെ കാലിബര്‍ തിരിച്ചറിയാത്തത് കൊണ്ടാകും. ഒന്ന് സമ്മതം മൂളിയാല്‍ റാഞ്ചിക്കൊണ്ടുപോകാന്‍ അര ഡെസന്‍ ടീം മാനേജ്‌മെന്റെങ്കിലും ഗുണ്ടോഗന് വേണ്ടി കാത്ത് നില്‍പ്പുണ്ട്. തുര്‍ക്കി, സൗദി, ഖത്തര്‍ ലീഗുകളിലെ ടീമുകള്‍ ഗുണ്ടോഗനായി വട്ടം പിടിച്ചു നില്‍ക്കുകയാണ്. ഏതു വിധേയനേയും തങ്ങളുടെ പഴയ മിഡ്ഫീല്‍ഡ് കുതിരയെ തിരികെ സിറ്റിയിലേക്ക് കൊണ്ടുപോകാന്‍ പെപ്പ് ഗ്വാര്‍ഡിയോളയും വന്‍ ഓഫറുകളുമായുണ്ട്. 30 മില്യന്‍ യൂറോസിന്റെ പാക്കേജാണ് പല ക്ലബുകളും ഗുണ്ടഗോണിനു വേണ്ടി മുന്നോട്ട് വയ്ക്കുന്നത്.

ഗുണ്ടോഗന്‍ കൂടി പോകുന്നതോടെ കഴിഞ്ഞ സമ്മര്‍ സീസണില്‍ ബാഴ്‌സലോണ കൊണ്ടുവന്ന താരങ്ങളില്‍ ഇനി ഇനിഗോ മാര്‍ട്ടിനെസ് മാത്രമാകും അവശേഷിക്കുക. റൊണാള്‍ഡ് അരൗഹോ 10 മില്യന്‍ യൂറോസിന്റെ ഡീലില്‍ ബാഴ്‌സലോണ വിടാന്‍ ഒരുങ്ങുകയാണ്. മിക്കല്‍ഫയെ ബാഴ്‌സ വില്‍ക്കാന്‍ വച്ചിരിക്കുന്നു. അതായത് ഫ്രീ ട്രാന്‍സ്ഫര്‍ വിന്‍ഡോയില്‍ താരങ്ങളെ കൊണ്ടുവന്നിട്ട് മൂല്യം വര്‍ധിപ്പിച്ച് വലിയ വിലയ്ക്കു വില്‍ക്കുകയെന്ന കച്ചവടക്കാരന്റെ ബുദ്ധിയിലാണ് ബാഴ്‌സ മാനേജ്‌മെന്റ് പെരുമാറിക്കൊണ്ടിരിക്കുന്നത് എന്നര്‍ത്ഥം.

ഇങ്ങനെയൊക്കെയാണെങ്കിലും മികച്ച ഫോമില്‍ നില്‍ക്കുമ്പോള്‍ തന്നെ അന്താരാഷ്ട്ര കരിയര്‍ അവസാനിപ്പിക്കാനുളള തീരുമാനത്തിലാണ് ഇല്‍കേ ഗുണ്ടോഗന്‍. അന്താരാഷ്ട്ര മത്സരങ്ങളില്‍ നിന്ന് വിരമിക്കുന്നതിന്റെ സൂചനകള്‍ ഗുണ്ടോഗന്‍ കഴിഞ്ഞ ദിവസം പ്രകടിപ്പിച്ചിരുന്നു. കഴത്തില്‍ നിന്ന് കരകേറുന്ന ജര്‍മനിയെ സംബന്ധിച്ചിടത്തോളം വലിയ പ്രതിസന്ധിയാകും തീരുമാനം സൃഷ്ടിക്കുക. അവരുടെ വിശ്വസ്ഥനായ മറ്റൊരു മിഡ്ഫീല്‍ഡര്‍ ടോണി ക്രൂസും മുന്നേറ്റക്കാരന്‍ തോമസ് മുള്ളറും യൂറോ കപ്പോടെ വിരമിച്ചിരുന്നു. ഇല്‍കേ കൂടി പോയാല്‍ അത് ജര്‍മനിക്ക് വലിയ തിരിച്ചടിയാകും.