ബിഗ് ബോസില്‍ നിന്ന് മോഹന്‍ലാല്‍ പുറത്തേക്കോ? അവതാരക സ്ഥാനത്ത് നിന്ന് മോഹന്‍ലാല്‍ മാറിയേക്കുമെന്ന് സൂചന; പകരക്കാരുടെ പട്ടികയില്‍ പൃഥ്വിരാജും മംമ്തയും

കൊച്ചി: ബിഗ് ബോസ് മലയാളം റിയാലിറ്റി ഷോ സീസണ്‍ ഏഴ് ആരംഭിക്കാന്‍ ചുരുങ്ങിയ മാസങ്ങള്‍ ശേഷിക്കെ അവതാരക സ്ഥാനത്ത് നിന്നും മോഹന്‍ലാല്‍ മാറിയേക്കുമെന്ന് സൂചന. ആറാം സീസണിന്റെ തുടക്കത്തിലും മോഹന്‍ലാല്‍ അവതാരക സ്ഥാനത്ത് നിന്നും മാറുമെന്ന ചര്‍ച്ചകള്‍ സജീവമായിരുന്നു. എന്നാല്‍ ഇപ്പോഴിതാ ഏറെക്കുറെ സ്ഥിരീകരിക്കാവുന്ന വാര്‍ത്തകളാണ് ബിഗ്‌ബോസ് അണിയറയില്‍ നിന്ന് കേള്‍ക്കുന്നത്.

മോഹന്‍ലാല്‍ മാറുകയാണെങ്കില്‍ പകരം ആര് എന്ന ചോദ്യവും പ്രസക്തമാണ്. പ്രേക്ഷകരെ പിടിച്ച് നിര്‍ത്തുന്നതില്‍ വീക്കെന്‍ഡില്‍ എത്തുന്ന അവതാരകന് പ്രത്യേക സ്ഥാനമുണ്ട്. സിനിമയുടെ തിരക്കുകള്‍ ചൂണ്ടിക്കാട്ടി മോഹന്‍ലാല്‍ ഒഴിയുകയാണെങ്കില്‍ പൃഥ്വിരാജിനാണ് ചിലര്‍ സാധ്യത കാണുന്നത്. വനിതാ അവതാരക എന്ന നിലയില്‍ മംമ്ത മോഹന്‍ദാസിന്റെ പേരും ഉയര്‍ന്നു കേള്‍ക്കുന്നുണ്ട്. എന്നാല്‍ മോഹന്‍ലാലിനെ കൈവിടാതിരിക്കാന്‍ ബിഗ് ബോസ് അധികൃതര്‍ അവസാന നിമിഷവരെ ശ്രമിച്ചേക്കുമെന്നാണ് സൂചന.

മത്സരാര്‍ത്ഥികളുടെ പ്രകടനത്തോടൊപ്പമോ അതിനേക്കാളേറെയോ ബിഗ് ബോസ് മലയാളികള്‍ക്ക് പ്രിയങ്കരമാക്കിയതിന് പിന്നിലെ പ്രധാന കാരണം മോഹന്‍ലാല്‍ എന്ന അവതാരകനായിരുന്നു. സല്‍മാന്‍ ഖാന്റെയും കമല്‍ഹാസന്റേയും അഗ്രസീവ് സ്‌റ്റൈല്‍ മോഹന്‍ലാല്‍ പുറത്തെടുക്കുന്നില്ലെന്ന അഭിപ്രായം ഉണ്ടെങ്കിലും കുടുംബപ്രേക്ഷകരെ തൃപ്തിപ്പെടുത്തുന്നതായിരുന്നു താരത്തിന്റെ തനത് ശൈലി.

അതേസമയം തമിഴില്‍ പുതിയ സീസണില്‍ കമല്‍ഹാസന് പകരം വിജയ് സേതുപതിയാണ് അവതാരകനായി എത്തിയിരിക്കുന്നത്. ഇത് തന്റെ അവസാന ബിഗ് ബോസ് സീസണായിരിക്കുമെന്ന് കന്നഡ ബിഗ് ബോസിന്റെ അവതാരകന്‍ കിച്ച സുദീപും വ്യക്തമാക്കിയിട്ടുണ്ട്.