കരിപ്പൂരില്‍ വീണ്ടും സ്വര്‍ണ്ണം പൊട്ടിക്കല്‍ സംഘങ്ങള്‍; 13 പേര്‍ പിടിയില്‍

കരിപ്പൂര്‍ വിമാനത്താവളത്തിന് സമീപം സ്വര്‍ണ്ണം പൊട്ടിക്കല്‍ സംഘങ്ങള്‍ വീണ്ടും സജീവമാകുന്നതായി സൂചന. വിമാനത്താവള പരിസരത്ത് നിന്ന് സംശയകരമായ സാഹചര്യത്തില്‍ കണ്ടെത്തിയ 13 പേരെ പോലീസ് കസ്റ്റഡിയിലെടുത്തു. രണ്ട് കാറുകളും രണ്ട് ഇരുചക്ര വാഹനങ്ങളും ഇവരില്‍ നിന്ന് പിടിച്ചെടുത്തിട്ടുണ്ട്. വിമാനത്താവളത്തിന്റെ പാര്‍ക്കിംഗ് ഏരിയയില്‍ കേന്ദ്രീകരിച്ച് പ്രവര്‍ത്തിച്ചിരുന്ന രണ്ട് വ്യത്യസ്ത സംഘങ്ങളാണ് പിടിയിലായതെന്ന് പോലീസ് അറിയിച്ചു.

വിദേശത്ത് നിന്ന് സ്വര്‍ണവുമായി എത്തുന്ന യാത്രക്കാരെ പിന്തുടര്‍ന്ന് തട്ടിക്കൊണ്ടുപോയി സ്വര്‍ണം കൈക്കലാക്കുകയായിരുന്നു തങ്ങളുടെ ലക്ഷ്യമെന്ന് പിടിയിലായവര്‍ പോലീസിനോട് സമ്മതിച്ചു. വിമാനത്താവളത്തിന് പുറത്ത് വെച്ച് യാത്രക്കാരെ തടഞ്ഞുനിര്‍ത്തി ഭീഷണിപ്പെടുത്തിയും ആക്രമിച്ചും സ്വര്‍ണം തട്ടിയെടുക്കുന്ന രീതിയാണ് ഇത്തരം സംഘങ്ങള്‍ പിന്തുടരുന്നത്. പ്രതികളെ വിശദമായി ചോദ്യം ചെയ്തുവരികയാണെന്നും സംഭവത്തില്‍ കൂടുതല്‍ അന്വേഷണം ഊര്‍ജ്ജിതമാക്കിയതായും കരിപ്പൂര്‍ പോലീസ് വ്യക്തമാക്കി.

അതേസമയം, വിമാനത്താവളത്തില്‍ എത്തിയ മലപ്പുറം സ്വദേശിയായ യാത്രക്കാരനെ കാണാനില്ലെന്ന പരാതിയും പോലീസ് ഗൗരവമായി അന്വേഷിക്കുന്നുണ്ട്. ഈ തിരോധാനത്തിന് പിടിയിലായ സംഘങ്ങളുമായി വല്ല ബന്ധവുമുണ്ടോ എന്ന കാര്യവും പരിശോധിച്ചു വരികയാണ്. വിമാനത്താവള പരിസരത്ത് സുരക്ഷാ പരിശോധനകള്‍ കര്‍ശനമാക്കുമെന്നും ഇത്തരം ക്രിമിനല്‍ സംഘങ്ങളെ അമര്‍ച്ച ചെയ്യാന്‍ പ്രത്യേക നിരീക്ഷണം ഏര്‍പ്പെടുത്തുമെന്നും അധികൃതര്‍ അറിയിച്ചു.