വകുപ്പ് വിഭജനത്തില്‍ താമസം; ഇന്ന് വിജ്ഞാപനം വരുമെന്ന് കെ മുരളീധരന്‍

തിരുവനന്തപുരം: വി ഡി സതീശന്‍ നേതൃത്വത്തിലുള്ള യുഡിഎഫ് സര്‍ക്കാര്‍ അധികാരമേറ്റ് രണ്ടു ദിവസം കഴിഞ്ഞിട്ടും വകുപ്പ് വിഭജനത്തില്‍ അന്തിമ തീരുമാനം ഉണ്ടായിട്ടില്ല. മന്ത്രിമാരുടെ വകുപ്പുകള്‍ സംബന്ധിച്ച് ചില തര്‍ക്കങ്ങള്‍ നിലനില്‍ക്കുന്നതായി മന്ത്രി കെ മുരളീധരന്‍ സ്ഥിരീകരിച്ചു.

ഉന്നത വിദ്യാഭ്യാസം, ഫിഷറീസ് എന്നിവയുമായി ബന്ധപ്പെട്ട പ്രശ്‌നങ്ങളാണ് പ്രധാനമായും നിലനില്‍ക്കുന്നത്. ഈ തര്‍ക്കങ്ങള്‍ ഇന്നോടെ പരിഹരിക്കാനാകുമെന്ന് അദ്ദേഹം വ്യക്തമാക്കി. വൈകുന്നേരത്തോടെ വകുപ്പ് വിഭജന വിജ്ഞാപനം പുറപ്പെടുവിക്കുമെന്നും മുരളീധരന്‍ പറഞ്ഞു.

വകുപ്പ് വിഭജനത്തില്‍ ഉണ്ടായ വൈകിപ്പോക്കിനെക്കുറിച്ച് പ്രതികരിച്ച മന്ത്രി, ഇതില്‍ നാണക്കേടൊന്നുമില്ലെന്നും, സത്യപ്രതിജ്ഞ കഴിഞ്ഞത് ഇന്നലെയാണെന്നും ചൂണ്ടിക്കാട്ടി. അനാവശ്യ യാത്രകള്‍ ഒഴിവാക്കി ചെലവ് കുറയ്ക്കാനുള്ള നടപടികള്‍ സര്‍ക്കാര്‍ സ്വീകരിക്കുമെന്നും അദ്ദേഹം കൂട്ടിച്ചേര്‍ത്തു.

ആരോഗ്യരംഗത്ത് കൂടുതല്‍ വികസനങ്ങള്‍ ലക്ഷ്യമിട്ട് തിരുവനന്തപുരത്ത് രണ്ട് മെഡിക്കല്‍ കോളജുകള്‍ സ്ഥാപിക്കുമെന്നും മന്ത്രി അറിയിച്ചു. കൂടാതെ, ശബരിമല സ്വര്‍ണക്കൊള്ള കേസില്‍ ശക്തമായ അന്വേഷണം നടത്തുകയും കുറ്റക്കാര്‍ക്കെതിരെ കര്‍ശന നടപടികള്‍ സ്വീകരിക്കുമെന്നും അദ്ദേഹം വ്യക്തമാക്കി.

വകുപ്പ് സംബന്ധിച്ച ഔദ്യോഗിക വിജ്ഞാപനം പുറത്തിറങ്ങിയതിന് ശേഷം ബാക്കി കാര്യങ്ങള്‍ വിശദമായി അറിയിക്കാമെന്നും മന്ത്രി കൂട്ടിച്ചേര്‍ത്തു.