സര്‍ക്കാര്‍ രൂപീകരണത്തിന് നീക്കങ്ങള്‍ ശക്തം; വിജയിയുടെ സത്യപ്രതിജ്ഞ ഏഴിന്? _

തമിഴ്‌നാട്ടില്‍ വന്‍ വിജയം നേടിയതിന് പിന്നാലെ ടിവികെ സര്‍ക്കാര്‍ രൂപീകരണത്തിനായി തിരക്കിട്ട നീക്കങ്ങള്‍ ആരംഭിച്ചു. വിജയ് സത്യപ്രതിജ്ഞ ഏഴിന് നടക്കാമെന്ന സൂചനകളാണ് പുറത്ത് വരുന്നത്. സത്യപ്രതിജ്ഞയ്ക്ക് അനുമതി തേടി ഗവര്‍ണര്‍ക്ക് ഇ-മെയില്‍ അയച്ചതായും വിവരം. തെരഞ്ഞെടുപ്പ് വിജയത്തിന് ശേഷം ടിവികെ ആസ്ഥാനത്തെത്തിയ വിജയ് നിയുക്ത എംഎല്‍എമാരുമായി കൂടിക്കാഴ്ച നടത്തും. സര്‍ക്കാര്‍ രൂപീകരണത്തിന് രണ്ടാഴ്ചത്തെ സമയം ഗവര്‍ണറോട് വിജയ് ആവശ്യപ്പെട്ടിരുന്നു.

വലിയ ഒറ്റകക്ഷിയായെങ്കിലും 118 സീറ്റുകളുടെ കേവലഭൂരിപക്ഷം ലഭിക്കാത്ത സാഹചര്യത്തില്‍ മറ്റ് പാര്‍ട്ടികളുടെ പിന്തുണ ഉറപ്പാക്കാനാണ് ടിവികെയുടെ ശ്രമം. വിവിധ പാര്‍ട്ടികളുമായി ചര്‍ച്ചകള്‍ പുരോഗമിക്കുകയാണ്. പിന്തുണ തേടി സംഘടനാകാര്യ ജനറല്‍ സെക്രട്ടറി കെ സി വേണുഗോപാലിന് വിജയ് കത്തയച്ചതായും റിപ്പോര്‍ട്ടുണ്ട്.

ഇതിനിടെ, സിപിഐ ഡിഎംകെ സഖ്യത്തില്‍ തുടരുമെന്ന് വ്യക്തമാക്കിയിട്ടുണ്ട്. കനത്ത തോല്‍വിയെ തുടര്‍ന്ന് ഡിഎംകെ സഖ്യം ആത്മപരിശോധനയ്ക്കായി യോഗം ചേരും. പ്രതീക്ഷിക്കാത്ത തിരിച്ചടിയില്‍ സഖ്യം ഞെട്ടലിലാണ്. ദ്രാവിഡ മോഡല്‍ 2.0 ലക്ഷ്യമിട്ട് വീണ്ടും അധികാരത്തിലെത്താമെന്ന ആത്മവിശ്വാസത്തിലായിരുന്ന മുഖ്യമന്ത്രി എം കെ സ്റ്റാലിന് ഈ തിരഞ്ഞെടുപ്പ് വലിയ തിരിച്ചടിയായി. ടിവികെയുടെ വി എസ് ബാബുവിനോട് 8795 വോട്ടുകള്‍ക്കാണ് സ്റ്റാലിന്‍ പരാജയപ്പെട്ടത്.