ആരാകും കേരളത്തിന്റെ അടുത്ത മുഖ്യമന്ത്രി?; എഐസിസി നേതൃത്വം നാളെ എംഎല്‍എമാരുമായി കൂടിക്കാഴ്ച നടത്തും

തിരുവനന്തപുരം:  കേരള നിയമസഭാ തിരഞ്ഞെടുപ്പിലെ ഉജ്ജ്വല വിജയത്തിന് പിന്നാലെ, സംസ്ഥാനത്തിന്റെ അടുത്ത മുഖ്യമന്ത്രിയെ നിശ്ചയിക്കുന്നതിനായി കോണ്‍ഗ്രസ് ഹൈക്കമാന്‍ഡ് നിര്‍ണായക നീക്കങ്ങള്‍ ആരംഭിച്ചു. ഇതിന്റെ ഭാഗമായി എഐസിസി നിരീക്ഷകര്‍ നാളെ തിരുവനന്തപുരത്ത് പുതുതായി തിരഞ്ഞെടുക്കപ്പെട്ട എംഎല്‍എമാരുമായി നേരിട്ട് കൂടിക്കാഴ്ച നടത്തും. കെപിസിസി ആസ്ഥാനമായ ഇന്ദിരാ ഭവനില്‍ നടക്കുന്ന യോഗത്തില്‍ ഓരോ എംഎല്‍എയുടെയും വ്യക്തിപരമായ അഭിപ്രായം ഹൈക്കമാന്‍ഡ് പ്രതിനിധികള്‍ തേടും. ഒന്നിലധികം മുതിര്‍ന്ന നേതാക്കള്‍ മുഖ്യമന്ത്രി സ്ഥാനത്തേക്ക് സജീവ പരിഗണനയിലുള്ള സാഹചര്യത്തില്‍ തര്‍ക്കങ്ങളില്ലാത്ത ഒരു സമവായത്തിലെത്താനാണ് ദേശീയ നേതൃത്വത്തിന്റെ ശ്രമം.

എംഎല്‍എമാരുടെ വികാരം കൂടി ഉള്‍പ്പെടുത്തി തയ്യാറാക്കുന്ന വിശദമായ റിപ്പോര്‍ട്ട് കോണ്‍ഗ്രസ് അധ്യക്ഷന് സമര്‍പ്പിച്ച ശേഷമായിരിക്കും ഔദ്യോഗിക പ്രഖ്യാപനം ഉണ്ടാവുക. പത്ത് വര്‍ഷത്തെ ഇടവേളയ്ക്ക് ശേഷം ഭരണത്തിലേക്ക് തിരിച്ചെത്തുന്ന യുഡിഎഫിന് ജനകീയനും ഭരണപരിചയവുമുള്ള ഒരു നേതാവിനെ കണ്ടെത്തുക എന്നത് വലിയ വെല്ലുവിളിയാണ്. ഘടകകക്ഷികളുമായുള്ള ചര്‍ച്ചകള്‍ ആരംഭിക്കുന്നതിന് മുന്‍പ് സ്വന്തം പാര്‍ട്ടിയില്‍ മുഖ്യമന്ത്രിയുടെ കാര്യത്തില്‍ ഏകകണ്ഠമായ തീരുമാനം എടുക്കാനാണ് കോണ്‍ഗ്രസ് മുന്‍ഗണന നല്‍കുന്നത്.

നാളത്തെ യോഗത്തോടെ കേരളത്തിന്റെ ഭരണത്തലവന്‍ ആരാകുമെന്ന കാര്യത്തില്‍ ഏകദേശ ചിത്രം തെളിയുമെന്നാണ് രാഷ്ട്രീയ വൃത്തങ്ങള്‍ കരുതുന്നത്. വന്‍ ഭൂരിപക്ഷത്തോടെ അധികാരത്തിലേറുന്ന പുതിയ സര്‍ക്കാരിനെ ഐക്യത്തോടെ നയിക്കാന്‍ പ്രാപ്തിയുള്ള നേതാവിനെ കണ്ടെത്താനുള്ള ചര്‍ച്ചകളാണ് വരും മണിക്കൂറുകളില്‍ ഇന്ദിരാ ഭവനിലും ഡല്‍ഹിയിലും നടക്കാനിരിക്കുന്നത്.