കേവല ഭൂരിപക്ഷം തികയ്ക്കാനുള്ള ശ്രമത്തില്‍ വിജയ്; ചെറുകക്ഷികളെ ഒപ്പം കൂട്ടാന്‍ നീക്കം

ചെന്നൈ:  തമിഴ്‌നാട് നിയമസഭാ തിരഞ്ഞെടുപ്പില്‍ തമിഴക വെട്രി കഴകം (ടിവികെ) അപ്രതീക്ഷിത മുന്നേറ്റം കാഴ്ചവെച്ച സാഹചര്യത്തില്‍, ചെറുകക്ഷികളെയും കോണ്‍ഗ്രസിനെയും ഉള്‍പ്പെടുത്തി സര്‍ക്കാര്‍ രൂപീകരിക്കാന്‍ നടന്‍ വിജയ് നീക്കങ്ങള്‍ സജീവമാക്കി. 234 അംഗ നിയമസഭയില്‍ കേവല ഭൂരിപക്ഷത്തിന് 118 സീറ്റുകള്‍ വേണ്ടിവരുമെന്നിരിക്കെ, ഏറ്റവും വലിയ ഒറ്റക്കക്ഷിയായ ടിവികെ നിലവില്‍ 108 സീറ്റുകളിലൊതുങ്ങിയതോടെയാണ് സഖ്യസാധ്യതകള്‍ തേടുന്നത്. ഡിഎംകെ വിരുദ്ധ നിലപാട് സ്വീകരിച്ച വിജയ്, ബിജെപിയുമായി രാഷ്ട്രീയ വൈരം തുടരുന്നതിനാല്‍ അവര്‍ക്കൊപ്പമുള്ള എഐഎഡിഎംകെയോട് നിലവില്‍ അകലം പാലിക്കുകയാണ്.

കോണ്‍ഗ്രസിന്റെ പിന്തുണ ഉറപ്പാക്കാന്‍ ടിവികെ നേതൃത്വം ചര്‍ച്ചകള്‍ ആരംഭിച്ചിട്ടുണ്ട്. കോണ്‍ഗ്രസ് നേതാവ് രാഹുല്‍ ഗാന്ധി വിജയ്‌യെ ഫോണില്‍ വിളിച്ച് പിന്തുണ വാഗ്ദാനം ചെയ്തതായാണ് വിവരം. ഇതിന് പുറമെ ഇടതുപക്ഷ പാര്‍ട്ടികളെയും ഒപ്പം നിര്‍ത്താന്‍ വിജയ് ആഗ്രഹിക്കുന്നു. തിരഞ്ഞെടുപ്പ് പ്രചാരണ വേളയില്‍ ഇടതു നേതാക്കളെ വിജയ് പുകഴ്ത്തി സംസാരിച്ചിരുന്നു. ബിജെപി ബന്ധം ഉപേക്ഷിക്കണമെന്ന കര്‍ശന നിബന്ധനയോടെ മാത്രമേ എഐഎഡിഎംകെയുമായി ചര്‍ച്ചകള്‍ക്ക് സാധ്യതയുള്ളൂവെന്നാണ് ടിവികെ വൃത്തങ്ങള്‍ നല്‍കുന്ന സൂചന.

അഞ്ച് പതിറ്റാണ്ടിലേറെയായി തമിഴ്‌നാട് രാഷ്ട്രീയം അടക്കിഭരിച്ച ദ്രാവിഡ പാര്‍ട്ടികളുടെ ആധിപത്യത്തിന് അന്ത്യം കുറിച്ചാണ് വിജയ്‌യുടെ രാഷ്ട്രീയ പ്രവേശനം വിജയകരമായത്. മുഖ്യമന്ത്രി എം.കെ. സ്റ്റാലിന്‍ കൊളത്തൂര്‍ മണ്ഡലത്തില്‍ പരാജയപ്പെട്ടത് ഡിഎംകെ ക്യാമ്പിനെ ഞെട്ടിച്ചിട്ടുണ്ട്. ഭൂരിപക്ഷം തെളിയിക്കാന്‍ 11 സീറ്റുകള്‍ കൂടി ആവശ്യമുള്ള സാഹചര്യത്തില്‍ വിജയ് സ്വീകരിക്കുന്ന ഓരോ നിലപാടും തമിഴ്‌നാടിന്റെ രാഷ്ട്രീയ ഭാവിയെ സംബന്ധിച്ചിടത്തോളം അതീവ നിര്‍ണായകമാകും.