സംസ്ഥാനത്ത് വൈദ്യുതി നിയന്ത്രണം

സംസ്ഥാനത്ത് കടുത്ത വൈദ്യുതി പ്രതിസന്ധിയെ തുടര്‍ന്ന് നിയന്ത്രണം പ്രഖ്യാപിച്ച് കെഎസ്ഇബി. ഇനി വൈദ്യുതി മുടക്കങ്ങള്‍ പീക്ക് ലോഡ് മാനേജ്‌മെന്റ് എന്ന പേരില്‍ എസ്എംഎസ് വഴി മുന്‍കൂട്ടി അറിയിക്കുമെന്ന് അധികൃതര്‍ അറിയിച്ചു. 15 മിനിറ്റില്‍ നിന്ന് അരമണിക്കൂര്‍ വരെയായിരിക്കും നിയന്ത്രണ സമയം.

വൈദ്യുതി ആവശ്യകത സാധാരണ പരിധിയെ കവിയുകയും പ്രസരണ-വിതരണ ശൃംഖലയില്‍ വലിയ സമ്മര്‍ദ്ദം ഉണ്ടാകുകയും ചെയ്ത സാഹചര്യത്തിലാണ് ഈ തീരുമാനം. ഇതുവരെ അപ്രഖ്യാപിതമായി നടന്ന വൈദ്യുതി മുടക്കങ്ങള്‍ ജനങ്ങള്‍ക്ക് വലിയ ബുദ്ധിമുട്ടുണ്ടാക്കിയിരുന്നു.

ഈ പ്രശ്‌നങ്ങള്‍ക്ക് പരിഹാരമായി മുന്‍കൂട്ടി അറിയിപ്പ് നല്‍കുന്ന സംവിധാനം നടപ്പിലാക്കുന്നതോടൊപ്പം, പ്രതിസന്ധി മറികടക്കാന്‍ മറ്റ് പര്യാപ്ത മാര്‍ഗങ്ങളും കെഎസ്ഇബി പരിശോധിച്ചുവരികയാണ്.