നിയമസഭാ തിരഞ്ഞെടുപ്പ്: യു.ഡി.എഫ് അധികാരത്തില്‍ വരുമെന്ന് കുഞ്ഞാലിക്കുട്ടി

നിയമസഭാ തിരഞ്ഞെടുപ്പില്‍ യു.ഡി.എഫ് അധികാരത്തില്‍ വരുമെന്ന് മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടി വ്യക്തമാക്കി. എല്‍.ഡി.എഫ് നേതാക്കളില്‍ ആത്മവിശ്വാസക്കുറവ് പ്രകടമാണെന്നും അവരുടെ പ്രസ്താവനകളില്‍ നിന്നുതന്നെ അത് വ്യക്തമായെന്ന് അദ്ദേഹം പറഞ്ഞു.

ഉപമുഖ്യമന്ത്രി സ്ഥാനം ലീഗ് ആവശ്യപ്പെട്ടിട്ടില്ലെന്നും, ഇത്തരം ചര്‍ച്ചകള്‍ ഇപ്പോള്‍ ആഗ്രഹിക്കുന്നില്ലെന്നും കുഞ്ഞാലിക്കുട്ടി കൂട്ടിച്ചേര്‍ത്തു. സംസ്ഥാനത്ത് യു.ഡി.എഫിന് അനുകൂല തരംഗം നിലനില്‍ക്കുകയാണെന്നും 100 സീറ്റുകള്‍ വരെ നേടാനുള്ള സാധ്യതയുണ്ടെന്നും അദ്ദേഹം അഭിപ്രായപ്പെട്ടു. പ്രതിപക്ഷ നേതാവ് വി.ഡി. സതീശന്‍ പറഞ്ഞ കണക്കുകള്‍ ആശയവിനിമയത്തിന്റെ അടിസ്ഥാനത്തിലാണെന്നും, അതുതന്നെയാകും ഫലം ലഭിക്കുകയെന്നും കുഞ്ഞാലിക്കുട്ടി വ്യക്തമാക്കി. കോഴിക്കോട് ജില്ല ഉള്‍പ്പെടെ എല്ലാ മണ്ഡലങ്ങളിലും വിജയം പ്രതീക്ഷിക്കുന്നുവെന്നും അദ്ദേഹം പറഞ്ഞു.

ഇതിനിടെ, മികച്ച പോളിംഗ് ഉണ്ടായപ്പോള്‍ എല്ലായ്‌പ്പോഴും യു.ഡി.എഫ് മികച്ച വിജയം നേടിയിട്ടുണ്ടെന്ന് പാണക്കാട് സാദിഖ് അലി തങ്ങള്‍ പറഞ്ഞു. തുടക്കത്തില്‍ പറഞ്ഞതുപോലെ റെക്കോര്‍ഡ് ഭൂരിപക്ഷം തന്നെ ലഭിക്കുമെന്ന ആത്മവിശ്വാസവും അദ്ദേഹം പ്രകടിപ്പിച്ചു. കഴിഞ്ഞ തിരഞ്ഞെടുപ്പിനെക്കാള്‍ കൂടുതല്‍ സീറ്റുകള്‍ മുസ്ലിം ലീഗിന് നേടാനാകുമെന്ന പ്രതീക്ഷയും അദ്ദേഹം പങ്കുവച്ചു.