ഹോര്‍മുസ് കടലിടുക്ക് വഴി യാത്ര ചെയ്യാന്‍ രണ്ട് എല്‍പിജി കപ്പലുകള്‍ക്ക് അനുമതി

പശ്ചിമേഷ്യന്‍ സംഘര്‍ഷത്തെത്തുടര്‍ന്ന് ആഴ്ചകളായി ഹോര്‍മുസ് കടലിടുക്കില്‍ കുടുങ്ങിക്കിടന്ന ഇന്ത്യന്‍ കപ്പലുകള്‍ക്ക് ഒടുവില്‍ മോചനം. ഇന്ത്യന്‍ വിദേശകാര്യ മന്ത്രി എസ്. ജയശങ്കറും ഇറാന്‍ വിദേശകാര്യ മന്ത്രി അബ്ബാസ് അറാഗ്ചിയും നടത്തിയ നിര്‍ണ്ണായക ചര്‍ച്ചകള്‍ക്കൊടുവിലാണ് രണ്ട് ഇന്ത്യന്‍ എല്‍പിജി കപ്പലുകള്‍ക്ക് ഇറാന്‍ അനുമതി നല്‍കിയത്. രണ്ടാഴ്ചയായി മേഖലയില്‍ കുടുങ്ങിയ 28 കപ്പലുകളില്‍ ഒന്ന് ഇതിനകം സുരക്ഷിതമായി യാത്ര തിരിച്ചതായി പിടിഐ റിപ്പോര്‍ട്ട് ചെയ്തു. സൗദിയില്‍ നിന്നുള്ള ക്രൂഡ് ഓയില്‍ കപ്പല്‍ ഇന്ന് ഇന്ത്യയിലെത്തുന്നതോടെ രാജ്യത്തെ ഇന്ധന വിതരണത്തിലെ ആശങ്കകള്‍ക്ക് നേരിയ ആശ്വാസമാകും.

അതേസമയം, മേഖലയില്‍ സംഘര്‍ഷം അതിരൂക്ഷമായി തുടരുകയാണ്. ഇറാന്റെ പ്രധാന എണ്ണക്കയറ്റുമതി കേന്ദ്രമായ ഖാര്‍ഗ് ഐലന്‍ഡിലെ സൈനിക കേന്ദ്രങ്ങളില്‍ യുഎസ് ശക്തമായ ആക്രമണം നടത്തി. ഇതിന് പിന്നാലെ 2,500 ഓളം മറീന്‍ സൈനികരെ അമേരിക്ക പശ്ചിമേഷ്യയിലേക്ക് നിയോഗിച്ചു. സൗദി അറേബ്യ ലക്ഷ്യമിട്ടെത്തിയ മിസൈല്‍-ഡ്രോണ്‍ ആക്രമണങ്ങള്‍ പ്രതിരോധ സേന തകര്‍ത്തു. കുവൈറ്റിലും ഖത്തറിലും ആക്രമണ ഭീഷണിയെത്തുടര്‍ന്ന് ജനങ്ങളെ ഒഴിപ്പിക്കുന്നത് ഉള്‍പ്പെടെയുള്ള മുന്‍കരുതല്‍ നടപടികള്‍ സ്വീകരിച്ചു വരുന്നു. യുഎഇയില്‍ പരിക്കേറ്റവരുടെ എണ്ണം 141 ആയി ഉയര്‍ന്നതായും, യുദ്ധസമാനമായ ദൃശ്യങ്ങള്‍ പകര്‍ത്തിയ 45 പേരെ അബുദാബി പോലീസ് അറസ്റ്റ് ചെയ്തതായും റിപ്പോര്‍ട്ടുകള്‍ വ്യക്തമാക്കുന്നു.