അമ്പലപ്പുഴയില്‍ മത്സര സാധ്യത തള്ളാതെ വി എ അരുണ്‍കുമാര്‍

അമ്പലപ്പുഴയില്‍ മത്സര സാധ്യത തള്ളാതെ മുന്‍ മുഖ്യമന്ത്രി വിഎസ് അച്യുതാനന്ദന്റെ മകന്‍ വിഎ അരുണ്‍കുമാര്‍. സ്ഥാനാര്‍ഥിത്വം തീരുമാനിക്കുന്നത് പാര്‍ട്ടിയാണെന്നും അതുസംബന്ധിച്ച് അന്തിമ തീരുമാനം പാര്‍ട്ടി നേതൃത്വത്തിന്റേതാണെന്നും അദ്ദേഹം വ്യക്തമാക്കി. ജി സുധാകരന്‍ മത്സരിക്കുന്ന കാര്യത്തെക്കുറിച്ച് തനിക്ക് വ്യക്തമായ വിവരം ഇല്ലെന്നും അരുണ്‍കുമാര്‍ പ്രതികരിച്ചു.

ജി സുധാകരനുമായി വ്യക്തിപരമായ ബന്ധം മാത്രമാണ് ഉള്ളതെന്നും അദ്ദേഹം മത്സരിക്കുമോ ഇല്ലയോ എന്നത് പറയേണ്ടത് താനല്ലെന്നും അരുണ്‍കുമാര്‍ വ്യക്തമാക്കി. ആ തീരുമാനം അദ്ദേഹത്തിന്റെ വ്യക്തിപരമായ കാര്യമാണെന്നും അദ്ദേഹം കൂട്ടിച്ചേര്‍ത്തു.

അതേസമയം, അമ്പലപ്പുഴയില്‍ ജി സുധാകരന്‍ പൊതുസ്വതന്ത്രനായി മത്സരിച്ചാല്‍ പൂര്‍ണ്ണ പിന്തുണ നല്‍കുമെന്ന് എഎ ഷുക്കൂര്‍ പറഞ്ഞു. അമ്പലപ്പുഴയില്‍ മത്സരിക്കാന്‍ തനിക്ക് താല്‍പര്യമുണ്ടായിരുന്നുവെങ്കിലും ജി സുധാകരന്‍ സ്വതന്ത്ര സ്ഥാനാര്‍ഥിയായി രംഗത്തെത്തുകയാണെങ്കില്‍ അദ്ദേഹത്തിനായി പ്രവര്‍ത്തിക്കാന്‍ മുന്നില്‍ നില്‍ക്കുമെന്ന് കെപിസിസി വൈസ് പ്രസിഡന്റ് വ്യക്തമാക്കി.