ഇറാന്റെ പുതിയ പരമോന്നത നേതാവായി മോജ്തബ ഖമനയി ചുമതലയേറ്റു

ടെഹ്‌റാന്‍: കൊല്ലപ്പെട്ട ആയത്തുല്ല അലി ഖമനയിയുടെ മകന്‍ മോജ്തബ ഖമനയി ഇറാന്റെ പുതിയ പരമോന്നത നേതാവായി ചുമതലയേറ്റു. ഖമനയിയുടെ രണ്ടാമത്തെ മകനായ മോജ്തബ, ഇറാന്റെ ഭരണസംവിധാനത്തിലും സൈനിക വ്യൂഹത്തിലും ദീര്‍ഘകാലമായി നിര്‍ണ്ണായക സ്വാധീനമുള്ള വ്യക്തിയാണ്. നിലവില്‍ ഹൊജ്ജത്തുല്‍ ഇസ്ലാം എന്ന മധ്യനിര മതപദവിയിലുള്ള അദ്ദേഹം, പിതാവിന്റെ മരണത്തെത്തുടര്‍ന്ന് രാജ്യം നേരിടുന്ന അതീവ സങ്കീര്‍ണ്ണമായ രാഷ്ട്രീയ സാഹചര്യത്തിലാണ് ഈ ഉന്നത പദവിയിലേക്ക് എത്തുന്നത്. 1969-ല്‍ ഇറാനിലെ മഷ്ഹദില്‍ ജനിച്ച മോജ്തബ, ക്വോം സെമിനാരിയില്‍ നിന്നാണ് തന്റെ മതപഠനം പൂര്‍ത്തിയാക്കിയത്.

സൈനികവും ഭരണപരവുമായ മേഖലകളില്‍ വലിയ അനുഭവസമ്പത്തുള്ള നേതാവാണ് മോജ്തബ ഖമനയി. 1987-1988 കാലഘട്ടത്തില്‍ നടന്ന ഇറാന്‍-ഇറാഖ് യുദ്ധത്തില്‍ അദ്ദേഹം സജീവമായി പങ്കെടുത്തിരുന്നു. 2009-ലെ വിവാദപരമായ തിരഞ്ഞെടുപ്പിനെത്തുടര്‍ന്ന് ഇറാനിലുണ്ടായ ജനകീയ പ്രതിഷേധങ്ങളെ അടിച്ചമര്‍ത്തുന്നതില്‍ മോജ്തബ വഹിച്ച പങ്ക് വളരെ വലുതാണ്. ഐആര്‍ജിസിയിലെ (IRGC) അര്‍ദ്ധസൈനിക വിഭാഗമായ ബസിജിന്റെ പൂര്‍ണ്ണ നിയന്ത്രണം അദ്ദേഹത്തിനായിരുന്നു. ഈ സൈനിക സ്വാധീനം തന്നെയാണ് ഇറാന്റെ പുതിയ നേതൃത്വത്തിലേക്ക് അദ്ദേഹത്തെ എത്തിക്കുന്നതില്‍ പ്രധാന ഘടകമായത്.

വ്യക്തിപരമായ വലിയ ആഘാതങ്ങള്‍ക്കിടയിലാണ് മോജ്തബ ഈ പദവി ഏറ്റെടുക്കുന്നത്. ഫെബ്രുവരി 28-നുണ്ടായ ആക്രമണത്തില്‍ പിതാവ് അലി ഖമനയിക്കൊപ്പം മോജ്തബയുടെ ഭാര്യയും മകനും മാതാവും കൊല്ലപ്പെട്ടിരുന്നു. കുടുംബാംഗങ്ങളെ നഷ്ടപ്പെട്ട ഈ സാഹചര്യത്തിലും രാജ്യത്തിന്റെ പരമാധികാരം ഏറ്റെടുത്ത മോജ്തബയുടെ നേതൃത്വം വരുംദിവസങ്ങളില്‍ പശ്ചിമേഷ്യയിലെ രാഷ്ട്രീയ ഗതിവിഗതികളില്‍ നിര്‍ണ്ണായകമാകും. പുതിയ നേതാവിനെ അസംബ്ലി ഓഫ് എക്‌സ്‌പെര്‍ട്സ് ഔദ്യോഗികമായി അംഗീകരിച്ചതോടെ ഇറാനിലെ അധികാര കൈമാറ്റം പൂര്‍ത്തിയായിരിക്കുകയാണ്.